Garaşsyzlyk her bir halkyň taryhynda Mukaddeslik, Beýiklik we Bütewilik diýen düşünjeler bilen utgaşýan iň beýik gymmatlykdyr. Berkarar döwletiň täze eýýamynyň Galkynyşy döwründe ata Watanymyzyň Şanly Garaşsyzlygynyň 35 ýyllyk baýramyny uly zähmet ýeňişleri, bedew bady bilen gazanylýan belent üstünlikler bilen garşylamagymyz halkymyzda, aýratyn hem bilim ulgamynyň işgärlerinde uly buýsanç we guwanç duýgularyny döredýär.

Garaşsyzlygyň  geçen 35 ýyly — bu diňe bir taryhy döwür bolman, eýsem Türkmenistanyň syýasy, ykdysady, medeni we bilim ulgamynda gazanan beýik özgerişlikleriniň, synmaz erkinliginiň we ösüş ýolunyň aýdyň subutnamasydyr. Hormatly Prezidentimiziň hem-de Gahryman Arkadagymyzyň parasatly ýolbaşçylygynda ýurdumyz dünýä giňişliginde öz mynasyp ornuny berkitdi, parahatçylyk söýüjilik we hemişelik Bitaraplyk ýörelgelerine yzygiderli eýerip, bagtyýar geljege tarap ynamly öňe barýar.

Bilim ulgamy — döwletimiziň we jemgyýetimiziň ösüşiniň dowanly ýoludyr. Garaşsyzlyk ýyllary içinde ýurdumyzda ösen milli we sanly bilim ulgamy kemala geldi. Döwlet derejesinde durmuşa geçirilýän reformalar netijesinde, ýaş nesillere halkara standartlaryna gabat gelýän döwrebap bilim berilmegi, sanly bilim ulgamynyň ornaşdyrylmagy we terbiýeçilik işleriniň guralmagy üçin ähli şertler döredildi. Bilim almaga höwesli, giň dünýägaraýyşly, sanly tehnologiýalara ussatlyk bilen eýerýän watançy ýaşlary ýetişdirmek — biz mugallymlaryň paýyna düşýän iň jogapkärli hem-de mukaddes borçdur.

Mugallym hökmünde, ýaşlarymyzyň ýüreginde Watana bolan söýgini, milli gymmatlyklarymyza, taryhymyza we ene dilimize bolan hormaty terbiýelemek biziň baş maksadymyzdyr. Türkmenistanyň Garaşsyzlygynyň 35 ýyllyk baýramçylyk dabaralarynyň bosagasynda gazanýan üstünliklerimiz, ýeten beýik sepgitlerimiz bilim işgärlerini täze döredijilikli zähmete, belent maksatlara ruhlandyrýar.

Ata Watanymyzy beýik ösüşlere we şanly geljege ynamly alyp barýan Gahryman Arkadagymyzyň we Arkadagly Gahryman  Serdarymyzyň janlary sag, ömürleri uzak, beýik işleri rowaçlyklara beslensin!

Garaşsyzlygymyzyň şanly 35 ýyllyk baýramy gutly bolsun!

Aşgabat maliýe-ykdysady orta hünär mekdebiniň mugallymy

Merjen Annamuhammedowа