Häzirki döwürde nirä seretsek haýsydyr bir zadyň nyşany gözümize ilýär. Kärhanalar brendiň tanalmagy üçin dürli hili kärhana we haryt şekillerini, nyşanlary, abstrakt belgileri we başga-da her hili çyzgylary oýlap tapýarlar. Wagtyň geçmegi bilen kompaniýanyň işi has-da giňelýär ýa-da üýtgeýär, bu ýagdaýda her bir kompaniýa özüniň döwrebap işini takyk görkezýän haryt nyşanyny döredip, ony has-da kämilleşdirýär.
Bu makalamyzda dünýäniň meşhur brendleriniň haryt nyşanlarynyň ösüş taryhy dogrusynda gürrüň bereris.

Nike

Bu täsin maglumat ynanar ýaly däl, sebäbi köpleriň hakydalarynda orun alan «swoosh» («bellik») nyşanyny satyn almak kompaniýa üçin bary-ýogy 35 dollara düşüpdir. Onuň awtory talyp gyz Karolaýna Dewidson hasaplanýar.

«Swoosh» nyşany ýa-da başga bir söz bilen aýdylanda «jürlewük» diýen manyny berýän «swoosh» belgisi türgenleriň hereketlerini yzarlamaga mejbur edýär. «Swoosh» nyşany Karolaýnanyň döredijiliginiň üstünlikli başlangyjy bolup, oňa 35 dollardan millionlarça dollar gazanmaga ýol açdy.

Twix

Bu meşhur şokolad 1967-nji ýylda Beýik Britaniýada «Raider» diýen at bilen öndürilip başlandy. 1979-njy ýylda bolsa şokolad ABŞ-nyň ähli ýerlerine eksport edilip ugrady we şol ýerde bize häzirki tanyş bolan at bilen — «Twix» diýlip atlandyryldy. Şeýle-de bolsa, Irlandiýada ol häzirem «Raider» haryt nyşany bilen satylýar.

Apple

«Apple» kompaniýasynyň ilkinji nyşanynyň (1976-njy ýyl) Isak Nýutonyň alma agajynyň aşagyndaky şekillendirilen grawýurasy bolandygyny köpler bilmeýän bolsa gerek. Bu haryt nyşanyny kompaniýany esaslandyryjylaryň biri Ronald Weýn döredipdir. Gyzykly ýeri-de, «Apple» kompaniýasy açylanyndan iki hepde soň, üstünlik gazanjagyna ynanman, Ronald Weýn paýnamalaryň 10%-ini 800 dollara satyp, kompaniýany terk edipdir. Onuň gelen bu kararynyň netijesi hem geljekde gazanyp biljek milliardlarça dollary ýitirmegidir.
1977-nji ýylda bolsa dizaýner Rob Ýanow Stiw Jobsuň haýyşy boýunça müşderiniň talaplaryny nazarda tutup, täze haryt nyşanyny döredýär we onda ýönekeýlik, döwrebaplyk, tanalmak ýörelgelerinden ugur alýar. Älemgoşar reňkdäki bu dişlenen almanyň şekili 1998-nji ýyla çenli «Apple»-iň haryt nyşany boldy.
Bu ideýanyň esasyny saklamak bilen «Apple» nyşany reňkini, göwrümini we çyzgysyny yzygiderli üýtgedip geldi. Häzirki wagtda bize mälim bolan dişlenen adaty alma şekili 2015-nji ýylda döredildi.

Lacoste

Krokodiliň şekilindäki bu haryt nyşany dünýäde giňden tanalýar. Ol 1933-nji ýylda döredildi. Kompaniýany esaslandyryjy Žan Rene Lakoste şol döwrüň tanymal tennisçisi bolup, polo köýnegini tennis üçin egin-eşik hökmünde ulanyp başlapdyr. Tennis oýunçylarynyň arasynda Lakosteni «Alligator» lakamy bilen atlandyrypdyrlar. Hut şonuň üçinem ol köýnek öndürmek kararyna gelende, dostlarynyň biriniň çeken krokodiliniň keşbini haryt nyşany hökmünde alypdyr. Lakoste tennis meýdançasynda oýunlara gatnaşan mahaly onuň ähli eşikleri krokodil şekilli haryt nyşany bilen bezelipdir.

Lamborghini

Bu kaşaň awtoulagyň haryt nyşanynda öküz şahlary bilen hüjüm etmäge taýynlyk görýär. Ol döredilen döwründe kompaniýa traktorlary öndürýärdi, şeýle-de kompaniýany esaslandyryjy Ferruçço Lamborgini öküz söweşleriniň muşdagy bolansoň, öküziň şekilini güýçlüligiň we çydamlylygyň nyşany hökmünde haryt nyşany hökmünde peýdalandy. Soňlugy bilen bolsa kompaniýa «Ferrari» markasy bilen bäsleşmäge ukyply awtoulaglary öndürip başlady. «Lamborghini» şu günüň nazarynda kuwwatly, gymmatbaha superkarlary bilen tanalyp, ony alamatlandyrýan altyn öküziň nyşany bolsa ulaglar bilen sazlaşygy döredýär.

Coca-Cola

Bu meşhur gazlandyrylan içginiň haryt nyşany ilkinji gezek 1893-nji ýylda döredildi. Onuň ýazgysy kompaniýanyň ady bolup, elde gytak görnüşde ýazylan ýalydy. Onuň awtory Frenk Robinson bolupdy. Haryt nyşany birnäçe ýola üýtgedildi, aýratynam ony 1980-nji ýylda «Coke» atlandyrdylar, soň bolsa onuň ýazylyş şekilinem, ýazgysynam öňküsi ýaly edip üýtgetdiler. Häzirki «Coca Cola» brendiniň nyşany ilkinji şekiline meňzedildi, onuň bir tapawudy ýazgynyň gyzyl reňkde ýazylanlygydyr.

Çeşme: koloro.ua; turbologo.ru; stoneforest.ru; aromo.ru