Ýakynda Türkmenistanyň Bilim ministrliginiň hödürlemegi esasynda, ýokary okuw mekdepleri üçin niýetlenen «Halkara gatnaşyklarynyň teoriýasy» atly täze okuw kitaby çap edildi. Ony Türkmenistanyň Daşary işler ministrliginiň Halkara gatnaşyklary institutynyň Halkara gatnaşyklary we diplomatiýa kafedrasynyň uly mugallymy, filosofiýa ylymlarynyň kandidaty Begenç Karaýew taýýarlady. Bu barada Türkmenistanyň Bilim ministirliginiň resmi saýtynda habar berildi.
Habarda bellenilişi ýaly, okuw kitaby 4 bapdan ybarat bolup, halkara gatnaşyklarynyň we diplomatiýasynyň ylmy teoriýalaryna bagyşlanýar. Mundan başga-da, okuw kitaby halkara gatnaşyklary dersiniň maksatnamasyna laýyklykda taýýarlanyp, onda halkara gatnaşyklarynyň binýatlyk düşünjeleri, nazary esaslary, şeýle-de ylmy taýdan öwrenilýän täze ugurlar giňden beýan edilýär.
Kitapda halkara gatnaşyklarynyň teoriýasynyň esaslary we ugurlary, diplomatiýanyň hukuk esaslary, Türkmenistanyň Bitaraplyk syýasatynyň halkara gatnaşyklardaky orny, halkara gatnaşyklaryň teoriýasynda esasy paradigmalaryň ähmiýeti, logiki we ylmy esaslar giňişleýin ylmy taýdan açylyp görkezilýär.
