Soňky habarlar

Arhiw

«Altyn asyr» AFK kubogyna ýeňiş bilen girişdi

02:1315.03.2017
0
5753

14-nji martda Türkmenistanyň Aragatnaşyk ministrliginiň «Altyn asyr» futbol topary AFK-nyň kubogy — 2017 halkara ýaryşyndaky ilkinji duşuşygyny geçirdi. Gyrgyzystanyň çempiony — Oş şäheriniň «Alaý» futbol topary bilen myhmançylykda geçirilen duşuşyk 1:2 hasabynda türkmen futbolçylarynyň ýeňşi bilen tamamlandy. 

Birinji ýarymyň esasy wagtynyň tamamlanmagyna iki minut galýança hasaby açmak toparlaryň hiç birine-d eýgertmedi. Ýöne futboly onlaýn yzarlaýan käbir saýtlaryň beren maglumatyna görä, türkmen futbolçylary oýunda hüjüm artykmaçlygyny saklap geldiler. Şol hüjümleriň biri 43-nji minutda miwesini berdi we «Altyn asyr» Altymyrat Annadurdyýewiň dürs urgusy bilen öňe saýlandy. Birinji ýarymyň 3-nji goşmaça minudynda ýer eýeleriniň futbolçysy Akramjon Umarow dartgynly oýun pursadynda pökgini öz derwezesine girizdi. Şeýlelikde, Oş şäheriniň A.Suýumbaýew adyndaky stadionynda geçirilen duşuşygyň birinji ýarymy türkmen futbolçylarynyň 0:2 hasabyndaky artykmaçlygy bilen tamamlandy.

Utulyp barýan ýer eýeleriniň ikinji ýarymda esasy ünsi hüjüme gönükdirjekdigi öz-özünden düşnükli. Şeýlelikde, Akramjon Umarow 55-nji minutda «günäsini ýuwup», «Altyn asyryň» derwezesine bir jogap pökgüsini geçirmegi başardy. 1:2 hasaby duşuşygyň ahyryna çenli üýtgemedi — türkmen futbolçylar AFK-daky täze synagyna ýeňiş bilen girişdiler. Ýeri gelende aýtsak, bu netije «aragatnaşykçylaryň» AFK ýaryşlarynda myhmançylykda gazanan ilkinji ýeňşidir. 
«Altyn asyr» AFK-nyň Kubogyndaky ikinji duşuşygyny Täjigistanyň «Istikloly» bilen 4-nji aprelde Aşgabatda geçirer. Täjik toparynyň Gyrgyzystanyň «Dordoý» toparyny ýeňendigi üçin, bu duşuşygyň netijesiniň toparçanyň liderini kesgitlemekde paýynyň uly boljakdygy öz-özünden düşnükli.

Hasabatlary ýygnamagy halaýanlar üçin biz toparyň protokol maglumatlary bilen tanyşdyrýarys:

«Alaý» — «Altyn asyr» — 1:2 (0:2)
Gollar:
0:1, Altymyrat Annadurdyýew 43’
0:2, Akramjon Umarow 45+2’
1:2, Akramjon Umarow 55’.

Duşuşygyň geçirilen ýeri: Gyrgyzystan Respublikasynyň Oş şäheri, Ahmatbek Suýumbaýew adyndaky stadion.

Duşuşygyň baş emini: Mohammad Hasan Mahmud Arafah (Iordaniýa).

Tomaşaçy sany: 5000.

«Alaýyň» düzümi: Mahkamow Abdulaziz (d), Alimow Ilýaz (k), Abdurahmanow Odiljon, Ahmedow Morolimjon, Sidibe Modibo (Alimow 45’), Alia Silla, Umarow Akramjon, Tuhtasinow Umarbek (Werewkin 83’), Mamatow Bakytbek, Kydyraliýew Abror (Riskulow 73’), Rahmanow Şuhrat.

«Altyn asyryň» düzümi: Orazmuhammedow Mämmet (d), Babajanow Zafar, Söýünow Şöhrat, Orazalyýew Döwran (Ataýew Ahmet 90+3’), Muhadow Süleýman (Aşyrow Mekan 62’), Ýagşyýew Myrat (Mirsultanow Döwletgeldi 90+4’), Annaorazow Serdar, Jumanazarow Akmyrat, Batyrow Gurbangeldi, Geldiýew Serdar (k), Annadurdyýew Altymyrat.

Duýduryş alan futbolçylar: Silla 35, Rahmanow 36 — Akmyrat Jumanazarow 70.

Birinji duşuşyklardan soň, toparçanyň ýagdaýy:

1. «Istiklol» 1/3
2. «Altyn asyr» 1/3
3. «Alaý» 1/0
4. «Dordoý» 1/0

Teswirler
Teswir ýazmak üçin içeri giriň ýa-da registrasiýa boluň