Ýurdumyzda sanly ykdysadyýete geçmek, raýatlara hödürlenýän elektron hyzmatlaryň sanyny artdyrmak boýunça giň gerimli işler alnyp barylýar. “Türkmenportal” öz okyjylary üçin ýaňy ýakynda awtoulag sürüjileri üçin niýetlenip taýýarlanan “P.Ý.G.G. jerime töleg” atly ykjam programma üpjünçiligi barada giňişleýin gürrüň bermegi makul bildi.
P.Ý.G.G. jerime töleg programmasy näme?
Ýol hereketinde goýberilen ýalňyşlyklar sebäpli polisiýanyň ýol gözegçiligi gullugy tarapyndan sürüjilere ýazylan jerimeleriň töleglerini internet arkaly hakyky wagt tertibinde (“online” görnüşde) tölemek mümkinçiligini döretmek.
Programmany nädip gurnamaly?
Programma “akylly” ykjam telefonlar üçin niýetlenip, ony “Google play”-dan internet arkaly alyp gurnap bolýar. Apple enjamlary üçin IOS operasion ulgamyna niýetlenen programmasy bolsa iň ýakyn wagtda “Appstore” goýular.
Programmanyň amatly taraplary
- Hakyky wagt tertibinde töleg geçirmek mümkinçiligi;
- Töleg kassalaryna baryp nobata durmak üçin sarp edilýän wagtyň tygşytlanmagy;
- Tiz, ygtybarly we amatly.
Jerime boýunça tölenen tölegiň geçendigi nädip tassyklanýar?
Töleg geçirilenden soň sürüjiniň telefon belgisine ýörite SMS habary gelýär. Şol SMS habary PÝGG-niň işgärine görkezilýär.
Goşmaça sorag ýüze çyksa, PÝGG-niň işgäri öz aragatnaşyk ulgamy arkaly töleg barada maglumaty anyklap bilýär.
Programma arkaly töleg etmek üçin nämeler zerur?
- “Akylly” ykjam enjamy (smartfon, planşet) we onuň internete birikdirilen bolmagy;
- “Altyn asyr” bank kartynyň maglumatlary;
- “Altyn asyr” bank kartynyň CVC kody;
- “Altyn asyr” bank kartyna SMS habar hyzmatynyň birikdirilen bolmagy.
Programmadan peýdalanmak boýunça gözükdiriji.
- Programma açylan badyna telefon belgi soralýar. Bu setire telefon belgiňizi ýazyp, “Dowam” düwmesini basyň. Görkezen telefon belgiňize SMS habary arkaly programma girmek üçin bir gezeklik açarsözi iberilýär.
- Soňra “Açar söz” atly penjire açylýar. Bu penjirede telefon belgiňize iberilen açarsözi ýazyp, “Tassykla” düwmesini basyň. Yzy ýany esasy sahypa açylýar. Programmanyň interfeýsi ýönekeý, menýulary düşünikli. Esasy sahypa iki menýudan ybarat: “Töleg geçirmek” we “Töleglerim”.
- Adyndan belli bolşy ýaly, “Töleglerim” menýusynda tölegleriň taryhy görkezilýär. Menýuda jerimeler boýunça tölenen tölegleriň senesi, mukdary we geçip-geçmändigi barada maglumat görkezilýär. Islendik tölegiň üstüne basmak bilen, jerime boýunça giňişleýin maglumaty alyp bolýar.
- “Töleg geçirmek” menýusynyň üsti bilen PÝGG tarapyndan ýazylan jerimeler üçin internet arkaly hakyky wagt tertibinde töleg geçirilýär. Bu menýuda kararyň belgisi, jerime mukdary ýaly zerur setirler doldurylýar. Soňra bank kartynyň maglumatlary we CVC kody girizilýär, şeýlelikde töleg amala aşyrylýar. Az salymdan töleg geçendigi barada maglumat SMS habar arkaly telefon belgiňize gelýär.
- Mundan başga-da, programmada “Sazlamalar” düwmesi bar. Bu penjirede ulanyjynyň telefon belgisi, programmanyň wersiýasy görkezilýär we ulgamdan çykmak üçin düwmesi ýerleşdirilen.
“Altyn asyr” bank kartlarynyň CVC koduny bilmek boýunça gözükdirijini öňki wideolarymyzdan öwrenip bilersiňiz.
“P.Ý.G.G. jerime töleg” ykjam programma üpjünçiligi barada taýýarlanylan wideony sypdyrmaň!
Soraglaryňyz bar bolsa info@turkmenportal.com poçtamyza salgylanyp bilersiňiz.
