Türkmenistanyň Prezidenti Ministrler Kabinetiniň nobatdaky mejlisini geçirdi, Gurbanguly Berdimuhamedow Antalýa diplomatik forumyna gatnaşmak üçin Türkiýä ugrady, Aşgabatda halkara hokkeý ýaryşy geçiriler we beýleki habarlar
Türkmenistan
1. Türkmenistanyň Prezidenti Serdar Berdimuhamedow Ministrler Kabinetiniň nobatdaky mejlisini geçirdi, onda ýurdy ösdürmegiň ileri tutulýan ugurlary ara alnyp maslahatlaşyldy. Mejlisiň dowamynda döwlet Baştutany birnäçe resminamalara gol çekdi we Hökümete ykdysady ösüşi höweslendirmek, infrastrukturany ösdürmek we halkara ynsanperwer hyzmatdaşlygyny giňeltmek boýunça görkezmeleri berdi.
2. 16-njy martda Türkmenistanda ählihalk bag ekmek dabarasy geçiriler. Bag ekmek dabarasy ýurdy bagy-bossanlyga öwürmek, tokaý zolaklaryny döretmek we ekilen bag nahallaryna talabalaýyk ideg etmek maksady bilen geçirilýär. Türkmenistanyň Prezidentiniň gol çeken Kararyna laýyklykda, ministrliklere, pudaklaýyn dolandyryş edaralaryna, welaýatlaryň, Aşgabat we Arkadag şäherleriniň häkimliklerine ählihalk bag ekmek dabarasynyň ýokary derejede guramaçylykly geçirilmegini üpjün etmek tabşyryldy.
3. Türkmenistanda Oguz han adyndaky Inžener-tehnologiýalar uniwersitetiniň binýadynda hojalyk hasaplaşygynda işleýän «Oguz han» ylmy-tehnologiýalar merkezi dörediler. Türkmenistanyň Prezidenti degişli Karara gol çekdi. Resminama innowasion tehnologiýalary ösdürmek, emeli aň, kompýuter we mobil programmalaryny döretmek, innowasion tehnologiýalary döretmäge ýaşlary işjeň çekmek maksady bilen gol çekildi.
4. Şu ýylyň 27-28-nji martynda «Türkmenistanda syýahatçylygy ösdürmegiň esasy ugurlary we mümkinçilikleri» atly halkara maslahaty geçirmek meýilleşdirilýär. Foruma ugurdaş halkara düzümleriň, birnäçe döwletleriň iri syýahatçylyk guramalarynyň ýolbaşçylary hem-de wekilleri gatnaşarlar. Wekiller üçin Arkadag şäheri, täsin taryhy-medeni ýadygärlikler, muzeýler, umuman, ýurduň syýahatçylyk mümkinçilikleri bilen tanyşmaklary üçin şertler dörediler.
5. Türkmenistanda elektron neşirleriň sanyny artdyrmak boýunça degişli işler alnyp barylýar. Bu işler döwlet maksatnamalaryndan we sanly ykdysadyýeti ösdürmegiň Konsepsiýasyndan gelip çykýan wezipeleri üstünlikli ýerine ýetirmek maksady bilen ýerine ýetirilýär. Hususan-da, döwlet medeniýet edaralarynyň we KHBS-iň resmi saýtlaryny häzirki zaman talaplaryna laýyk gelýän maglumatlar bilen üpjün etmek boýunça çäreler görülýär. Şeýle hem bu düzümleriň işgärleriniň maglumat-kommunikasiýalar ulgamyndaky hünär derejelerini ýokarlandyrmak boýunça degişli işler alnyp barylýar.
6. 1-nji martda türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow Türkiýe Respublikasyna iş sapary bilen ugrady. Saparyň dowamynda Gurbanguly Berdimuhamedow Antalýada Prezident Rejep Taýyp Ärdogan bilen gepleşikleri geçirdi. Türkmenistanyň Halk Maslahatynyň Başlygy türk Liderini 70 ýaş ýubileýi bilen tüýs ýürekden gutlady we oňa türkmen milli içmegini sowgat berdi. Gepleşikleriň netijeleri boýunça türkmen-türk hyzmatdaşlygyny pugtalandyrmaga gönükdirilen ikitaraplaýyn resminamalaryň birnäçesine gol çekildi. Hususan-da, Türkmenistan we Türkiýe şu resminamalara gol çekdiler: Türkmenistan bilen Türkiýe Respublikasynyň arasynda uglewodorod serişdeleri babatda hyzmatdaşlyk etmek boýunça meýiller hakynda Jarnama; «Türkmengaz» döwlet konserni bilen Türkiýe Respublikasynyň Energetika we tebigy serişdeler ministrliginiň arasynda tebigy gaz ulgamynda hyzmatdaşlygy ösdürmek meselesi babatda özara hyzmatdaşlyk etmek hakynda Ähtnama; «Türkmenistan» awiakompaniýasy» açyk görnüşli paýdarlar jemgyýeti bilen Türk aeronawtika birleşigi uniwersitetiniň arasynda özara düşünişmek hakynda Ähtnama.
Sport habarlary
7. 15 — 20-nji aprel aralygynda Aşgabat şäherindäki Gyşky oýunlar sport toplumynda hokkeý boýunça halkara ýaryş geçiriler. Türkmenistanyň Prezidentiniň gol çeken Kararayna laýyklykda, ýaryşyň guramaçylyk işleri Türkmenistanyň Bedenterbiýe we sport baradaky döwlet komiteti tarapyndan alnyp barlar.
8. Futbol boýunça Türkmenistanyň çempionaty – 2023-iň bürünç medalynyň eýesi bolan Balkanabadyň «Nebitçi» topary Azerbaýjanda möwsümden öňki türgenleşigi tamamlady. Bakuwdaky türgenleşik ýygnanyşygynyň soňky synag oýnunda türkmen topary «Sumgait» bilen duşuşdy we 4:2 hasabynda ýeňiş gazandy. Ýokary liganyň toparlarynyň arasynda futbol boýunça Türkmenistanyň çempionatynyň täze möwsüminiň başlangyç tapgyrynda «Nebitçi» öz meýdançasynda «Merw» toparyny kabul eder. Oýun 4-nji martda, duşenbe güni geçiriler.
9. 2-3-nji martda Bütindünýä tennis gününiň bellenilmegi mynasybetli «Aşgabat» tennis akademiýasynyň meýdançalarynda uly raketkanyň ýaş ussatlary üçin ýaryş geçiriler. Bäsleşige 8 ýaşa çenli oglanlar we gyzlar gatnaşar. Guramaçylar hökmünde Türkmenistanyň Tennis federasiýasy we «Aşgabat» tennis akademiýasy çykyş edýär.
