Türkmenistanyň Prezidenti Serdar Berdimuhamedow ýurduň alty sany tejribeli diplomatyny «Türkmenistanyň ussat diplomaty» diýen tapawutlandyryş nyşany bilen sylaglady. Döwlet Baştutany degişli Karara her ýylyň 18-nji fewralynda bellenilýän Türkmenistanyň diplomatik işgärleriniň güni mynasybetli gol çekdi. Bu barada TDH habar berýär.

Kararda bellenilişi ýaly, diplomatlar Türkmenistanyň döwlet Garaşsyzlygyny hem-de Bitaraplygyny berkitmekde, daşary syýasat ugruny durmuşa geçirmekde, syýasy, ykdysady, medeni-ynsanperwer we beýleki gatnaşyklaryny ösdürmekde, döwlet bähbitlerini goramakda, ýaş hünärmenleri taýýarlamakda gazanan uly üstünlikleri hem-de diplomatik gullukda köp ýyllaryň dowamynda çeken halal, göreldeli zähmeti nazara alnyp, şeýle-de Türkmenistanyň diplomatik işgärleriniň güni mynasybetli sylaglandylar.

«Türkmenistanyň ussat diplomaty» diýen tapawutlandyryş nyşany bilen:

• Türkmenistanyň Daşary işler ministrliginiň Halkara gatnaşyklary institutynyň mugallymy Sapar Berdiniýazow;
• Türkmenistanyň diplomatik gullugynyň weterany Aman-Geldi Öwezowiç Baýramow;
• Türkmenistanyň diplomatik gullugynyň weterany Wladimir Akimowiç Kadyrow;
• Türkmenistanyň Daşary işler ministrliginiň Halkara gatnaşyklary institutynyň halkara gatnaşyklary we diplomatiýa kafedrasynyň mugallymy Kakajan Mommadow;
• Türkmenistanyň Russiýa Federasiýasyndaky (Moskwa şäheri) ilçihanasynyň geňeşçisi Serdar Tahirowiç Durdyýew;
• Soltan Pirmuhammedow (merhum) sylaglandy.

«Türkmenistanyň ussat diplomaty» diýen tapawutlandyryş nyşany 2021-nji ýylda döredildi. Bu sylag Türkmenistanyň döwlet Garaşsyzlygyny hem-de Bitaraplygyny berkitmekde, daşary syýasat ugruny durmuşa geçirmekde, syýasy, ykdysady, medeni-ynsanperwer we beýleki gatnaşyklaryny ösdürmekde, döwlet bähbitlerini goramakda uly üstünlikleri gazanan hem-de diplomatik gullukda köp ýyllaryň dowamynda halal, göreldeli zähmet çeken tejribeli diplomatlara berilýär.