«Türkmenaragatnaşyk» agentliginiň edara-kärhanalarynyň ýolbaşçylarydyr, hünärmenleriniň gatnaşmagynda 2024-nji ýylyň «Pähim-paýhas ummany Magtymguly Pyragy» diýlip atlandyrylmagy mynasybetli wagyz-nesihat maslahaty geçirildi.

Maslahatda çykyş edenler 2024-nji ýylyň Gahryman Arkadagymyzyň ýiti zehininden, jöwher paýhasyndan dörän «Pähim-paýhas ummany Magtymguly Pyragy» goşgusyndan ugur alnyp atlandyrylmagynyň, türkmen halkyny has-da buýsandyrandygyny belläp geçdiler. Çünki akyldar şahyryň döredijiligi türkmen döwletiniň we agzybir türkmen halkynyň dünýäniň ýüzünde ýeten belent derejesidir.

Bellenilişi ýaly, Türki medeniýetiň halkara guramasynyň — TÜRKSOÝ-nyň hemişelik geňeşiniň mejlisinde 2024-nji ýylyň «Beýik türkmen şahyry we akyldary Magtymguly Pyragy ýyly» diýlip yglan edilmegi, şeýle hem Magtymguly Pyragynyň golýazmalar toplumynyň BMG-niň Bilim, ylym we medeniýet meseleleri boýunça guramasynyň «Dünýäniň hakydasy» maksatnamasynyň halkara sanawyna hem-de Magtymguly Pyragynyň 300 ýyllygynyň 2024-2025-nji ýyllarda ÝUNESKO bilen bilelikde bellenilip geçiljek şanly seneleriň sanawyna girizilmegi nusgawy şahyrymyzyň döredijiliginiň dünýä derejesinde ykrar edilýändiginiň subutnamasydyr.

Maslahatyň ahyrynda Türkmenistanyň Prezidentiniň we Halk Maslahatynyň Başlygynyň taryhy-medeni mirasy aýawly gorap saklamaga we ony dünýä ýaýmaga gönükdirilen daşary syýasatynyň hem-de medeni diplomatiýasynyň üstünliklere beslenmegini arzuw etdiler.