«Türkmenportalyň» ozal habar berşi ýaly, «Altyn Asyr» milli operatory eSIM — wirtual belgi hyzmatyny hödürledi. Ol fiziki SIM-kartany ulanmazdan, öýjükli nyrh meýilnamasyny işjeňleşdirmäge mümkinçilik berýär.
Türkmenistanda eSIM-i birikdirmek üçin zerur:
- pasportyňyz bilen TM CELL-iň ofisine barmaly we eSIM üçin arza ýazmaly;
- eSIM-i birikdirmek üçin QR kody almaly;
- telefonyňyzy adaty SIM-karta arkaly Wi-Fi ýa-da ykjam internetiň üsti bilen internete birikdirmeli;
- telefonyň kamerasyny ýa-da QR kodlaryny skanirlemek üçin niýetlenen ýörite programmany ulanyp, QR koduny skanirlemeli;
- enjamyň ekranyndaky görkezmelere eýerip, eSIM-i gurmaly.
Möhüm! eSIM edinmezden ozal jübi telefonyňyzyň bu aýratynlygy goldaýandygyna göz ýetiriň. Muny enjam sazlamalarynda ýa-da öndürijiniň görkezmelerinde barlap bilersiňiz.
Isleseňiz, adaty SIM-karta birikdirilen öňden bar bolan telefon belgisini eSIM-e geçirip bolýar.
eSIM nähili işleýär?
eSIM gönüden-göni smartfonyň ulgam platasyna (motherboard) gurlan elektron SIM-kartadyr. Ýörite ýere salynýan adaty SIM-kartadan tapawutlylykda, eSIM enjama hemişelik berkidilen ýörite çipde gurlan programma üpjünçiliginden durýar.
Käbir smartfonlar aýratyn SIM-kartalar hökmünde hereket edýän birnäçe eSIM profiline eýe bolmaga mümkinçilik berýär. Her profiliň öz telefon belgisi we maglumat bukjasy bolýar.
eSIM näme üçin gerek?
Wirtual belgi has ygtybarly we howpsuz hasaplanýar, sebäbi ony ýitirip ýa-da döwüp bolmaýar. Ol smartfonyňyzda ýer tygşytlaýar we SIM-kartalaryň birnäçesi bar bolsa, fiziki taýdan tertipleşdirmek zerurlygyny aradan aýyrýar.
