Türkmenistanda 2023-nji ýylyň oktýabr aýynda geçirilen «Arkadagyň säheri» atly ilkinji halkara film festiwaly barada dokumental filmiň üstünde işlenilmegi tamamlaýjy tapgyrda alnyp barylýar. Filmde dürli ýurtlardan myhmanlary çagyrmakdan başlap, ýapylyş dabarasy bilen tamamlanýan festiwalyň taýýarlanylyşynyň we geçirilişiniň ähli tapgyrlary barada gürrüň berler.
Filmiň režissýory Annuş Täşliýew dokumental filmde meşhur myhmanlar bilen söhbetdeşlikleriň, açylyş dabarasynyň wideoýazgylarynyň, şeýle hem Türkmenistanyň Medeniýet institutynda geçirilen ussatlyk sapaklarynyň boljakdygyny aýtdy.
«Film diňe bir festiwalyň özüne däl, eýsem Türkmenistanyň medeniýetine we taryhyna-da bagyşlanýar. Filmde Merw we Nusaý ýaly gadymy şäherler, şeýle hem adaty türkmen senetçiligi we baý milli aşhanasy görkeziler» diýip, A.Täşliýew aýtdy.
Filmiň ýakyn wagtda ýaýlyma çykmagyna garaşylýar.
Festiwalyň açylyş dabarasy Arkadag şäherindäki Aman Gulmämmedow adyndaky döwlet drama teatrynda geçirildi. Onda Burak Özçiwit, Mehmet Bozdag we fransuz aktýory Eduard Montut ýaly tanymal sungat işgärleri teatryň öňünde gyzyl halydan geçdiler.
Halkara kinofestiwalynda birinji orny türkmenistanly režissýor Sapardurdy Annaýewiň «Kagyza ýazylan ykbal» filmi mynasyp boldy.
