Wengriýa Türkmenistanyň BMG-ä hödürlän Ählumumy howpsuzlyk strategiýasyny işläp taýýarlamak baradaky teklibini goldaýar. Muny Wengriýanyň daşary işler ministri Peter Siýýarto penşenbe güni Raşid Meredow bilen telefon arkaly söhbetdeşligiň barşynda mälim etdi diýip, «24.hu» habar berýär.
— BMG-niň Tertipnamasyny berkitmek, gapma-garşylyklary syýasy taýdan parahatçylykly ýol bilen çözmek we uruşlaryň öňüni almak üçin diplomatik tagallalary goldamak baradaky her bir teklip möhümdir – diýip, jenap Siýýarto özüniň Facebook sosial ulgamyndaky sahypasynda ýazýar.
— Biz dünýäniň islendik künjeginde, esasanam, goňşy ýurdumyzda parahatçylyga eltip biljek zatlaryň baryny goldaýarys – diýip, Wengriýanyň daşary işler ministri belledi.
Şu nukdaýnazardan, Türkmenistan Ählumumy howpsuzlyk strategiýasyny işläp taýýarlamagyň mümkinçiliklerini ara alyp maslahatlaşmaga başlamagy teklip edýär.
Ozal Ministrler Kabinetiniň Başlygynyň orunbasary, daşary işler ministri R.Meredowyň Birleşen Milletler Guramasynyň Baş Assambleýasynyň 2023-nji ýylyň 12-nji sentýabrynda Nýu-Ýork şäherinde öz işine başlajak nobatdaky 78-nji sessiýasynda Türkmenistanyň ileri tutýan garaýyşlary barada Türkmenistanyň Prezidentine hasabat berendigini habar beripdik.
