Türk radio we telewideniýe korporasiýasy (TRT) türkmen telewideniýesiniň wekilleri üçin amaly okuw geçirdiler diýip, «Turkmenistaninfo» TRT-e salgylanyp habar berýär.
Türkmen telewideniýesiniň wekilleri «TRT»-niň Ankaradaky esasy bölümine baryp gördüler. «TRT»-niň tejribeli işgärleri türkmenistanly kärdeşlerine surata düşürmegiň täzeçe usullary, täzelikler we animasiýa taýýarlamagyň tapgyrlary barada gürrüň berdiler. Okuw 17-nji iýulyndan 21-nji iýuly aralygynda, ýagny 5 gün dowam etdi. Oňa gatnaşan türkmenistanly hünärmenler şahadatnama aldylar, şeýle hem TRT-niň özboluşly ýaýlym tejribesi bilen tanyşdylar.
TRT tarapyndan 2022-nji ýylyň noýabr aýyndan bäri daşary ýurt habar beriş serişdeleri üçin amaly okuwlaryň geçirilýändigini bellemelidiris. 2015-nji ýyldan 2023-nji ýyla çenli guralan ýedi sany maksatnama boýunça Türkmenistanyň köpçülikleýin habar beriş serişdeleriniň wekilleriniň 68-si taýýarlyk geçdi.
