10-njy iýulda Türkmenistanyň Daşary işler ministrliginiň Halkara gatnaşyklary institutynda Žurnalistikanyň nazaryýeti we amalyýeti kafedrasynyň «Ýaş žurnalistler» ylmy-döredijilik gurnagynyň işjeň agzalarynyň guramagynda kitap okamak boýunça geçirilen «Kitap okan gullar, magnydan dokdur» atly bäsleşiginiň jemleri jemlendi.
Bäsleşige türkmen diplomatiýasynyň milli mekdebiniň ähli fakultetlerinden isleg bildiren talyplar gatnaşdylar. Bäsleşigiň dowamynda gatnaşyjylar Magtymguly Pyragynyň saýlanyp alnan 15 sany goşgusy, halypa ýazyjy, publisist Gurbannazar Orazgulyýewiň «Heňňam hekaýatlary» atly ýygyndysy hem-de Atajan Taganyň «Keseki» romany boýunça test soraglaryny çözdüler. Bäsleşigiň netijeleri boýunça 1-nji orna Halkara žurnalistikasy fakultetiniň 2-nji ýyl talyby Gurbanmyrat Aşyrow, 2-nji orna şol fakultetiň 2-nji ýyl talyby Ajaýyp Nobatowa, 3-nji orna bolsa şol fakultetiň 1-nji ýyl talyby Aýşirin Döwletowa mynasyp boldular.
«Kitap okan gullar, magnydan dokdur» atly kitap okamak bäsleşiginde ýeňiji bolan talyp «Gujurly nesil» bilim merkezinde daşary ýurt dilleri boýunça okuwlaryň bir tapgyryny (üç aý) tölegsiz okamaga hukuk gazandy hem-de Türkmenistanyň Daşary işler ministrliginiň Halkara gatnaşyklary institutynyň Hormat haty bilen sylaglandy. Baýrakly orunlary eýelänler bolsa «Gujurly nesil» bilim merkeziniň dürli görnüşli arzanladyşlaryna we institutyň Hormat hatlaryna mynasyp boldular.
