Türk kompaniýalary Türkmenistanda 50,9 milliard dollarlyk gurluşyk taslamalaryny ýerine ýetirdiler. Muny Türkiýäniň Söwda ministrligine salgylanyp, «Hurriyet Daily News» habar berdi.
Şu ýylyň birinji ýarymynda türk potratçylary daşary ýurtlarda 7,5 milliard dollarlyk jemi 110 şertnama baglaşdy. Bu bolsa, 2022-nji ýylyň degişli döwri bilen deňeşdirilende, 63% köpdür diýip, çeşme belleýär. Berilýän maglumata laýyklykda, dünýädäki çylşyrymly ykdysady ýagdaýa garamazdan, türk kompaniýalary 19,1 milliard dollarlyk 492 taslama üçin yglan edilen halkara bäsleşikde ýeňiş gazandy.
Bellenilişi ýaly, soňky elli ýylyň dowamynda Russiýa türk potratçylary üçin iň uly daşary ýurt bazary boldy. Has takygy, türk gurluşyk kompaniýalary 1972-nji ýyldan 2022-nji ýylyň iýuly aralygynda Russiýada 97,97 milliard dollarlyk taslamalary tamamlady. Bu bolsa olaryň daşary ýurtlarda tamamlan taslamalarynyň 20,4 göterimini emele getirýär.
Bu görkeziji babatdaky sanawda Russiýadan soňra Türkmenistan ýerleşýär. Türk gurluşyk kompaniýalary Türkmenistanda 50,9 milliard dollarlyk taslamalary durmuşa geçirdiler.
Maglumat hökmünde ýatlatsak, 1972-nji ýyldan 2023-nji ýylyň iýunyna çenli türk kompaniýalary 133 ýurtda umumy bahasy 480,5 milliard dollar bolan jemi 11 758 taslamany tamamladylar.
