Ozal habar berşimiz ýaly, Türkmenistanyň Prezidenti Serdar Berdimuhamedow 26-njy maýda Türkmenistanyň Ministrler Kabinetiniň sanly ulgam arkaly geçirilen mejlisinde şu ýyl ýurduň welaýatlarynda gallanyň bol hasylynyň ýetişdirilendigini belledi. Şeýle hem Prezident Serdar Berdimuhamedow Ahal, Lebap we Mary welaýatlarynda 2-nji iýunda, Balkan we Daşoguz welaýatlarynda bolsa 9-njy iýunda galla oragyna başlamaga ak pata berdi we hormatly ýaşululardan galla oragyna «Bissimilla!» bilen başlap bermeklerini haýyş etdi.
Şu ýyl Türkmenistan boýunça 690 müň gektar meýdanda ýetişdirilen bugdaýdan 1 million 400 müň tonna hasyl almak göz öňünde tutulýar. Galla oragyna gatnaşýan kombaýnlaryň ählisi-de daşary döwletlerde öndürilen «John Deere», «CLAAS», «Case» kysymly kämil we ýokary öndürijilikli kombaýnlardyr. Bu barada «Türkmenistan» gazetiniň şu günki sanynda habar berildi.
