Girmek
20 ýaşa çenli ýygyndylaryň arasyndaky Merkezi Aziýanyň futbol Assosiasiýasynyň çempionatynda Buharestiň «Rapid» toparynyň 17 ýaşly oýunçysy Adrian Ilýas Alekseý Ebersbah Türkmenistanyň ýaşlar ýygyndysynyň düzüminde çykyş etdi.
CAFA-2023 çempionaty 21-28-nji maý aralygynda Täjigistanyň Duşenbe we Tursunzade şäherlerinde geçirildi. Ýaryşa Türkmenistanyň, Täjigistanyň, Owganystanyň, Özbegistanyň hem-de Eýranyň ýygyndylary gatnaşdy.
Ýeri gelende bellesek, Ebersbah Kiprde doguldy. Ol futbol ýoluna Müsürde başlap, Kairiň uly bolmadyk toparynda futbol çykyş etdi. Soňra ol Abu-Dabide we Fransiýada «Pari sen-Žermeniň» akademiýasynda türgenleşdi.
Ebersbah heniz 13 ýaşynda wagty Türkmenistana gelip, «Altyn täç» toparyna goşulypdy. 14 ýaşynda Rumyniýa giden futbolçy häzir «Rapidiň» ýetginjekler toparynyň wekilidir. Bu ýerde oňa Oktawian Çihaia tälim berýär.
Ebersbah rumyn toparynda merkezi ýarymgoragda oýnaýar. «Rapidiň» «Stýaua» we «Dinamo» ýaly Rumyniýanyň iň meşhur toparlarynyň biridigini ýatladýarys.