2023-nji ýylyň 28-nji martynda Türkmenistanyň Daşary işler ministrliginiň Halkara gatnaşyklary institutynda «Parahatçylygyň ýaş çaparlary» atly akyl-paýhas bäsleşiginiň II möwsüminiň IV oýny geçirildi. «Dialog — parahatçylygyň kepili: gadymy eýýamyň diplomatik mirasynda parahatçylyk medeniýeti» atly umumy şygar astynda geçirilýän bu bäsleşigiň IV oýnunyň temasy «Gadymy Ariý we Hindistan siwilizasiýalary: diplomatiýanyň ruhy-ahlak binýatlary» diýlip atlandyryldy. Ozal habar berşimiz ýaly, 2023-nji ýylyň 10-njy martynda Türkmenistanyň Daşary işler ministrliginiň Halkara gatnaşyklary institutynda Ýaş diplomatlaryň mekdebiniň guramagynda geçirilýän «Parahatçylygyň ýaş çaparlary» atly akyl-paýhas bäsleşiginiň II möwsüminiň IV oýnunyň temasy bilen baglanyşykly bäsleşige gatnaşýan mekdep okuwçylary üçin Türkmenistanyň Medeniýet ministrliginiň Teatr we tomaşa edaralary bölüminiň başlygynyň orunbasary Baýramgeldi Çaryýewiň gatnaşmagynda Ariýleriň we Hindistanyň taryhy, diplomatiýasy we medeniýeti, türkmen-hindi gatnaşyklarynyň taryhy kökleri barada umumy okuw sapagy geçirilipdi.
Akyl-paýhas bäsleşiginiň II möwsüminiň IV oýnuna seçip alyş test synaglaryndan üstünlikli geçen mekdep okuwçylarynyň Aşgabat şäherinden 7 sanysy, Balkan welaýatyndan 2 sanysy, Daşoguz welaýatyndan 3 sanysy hem-de Mary welaýatyndan 4 sanysy gatnaşdy.
Çekeleşikli geçen bäsleşigiň jemlerine laýyklykda, Aşgabat şäherindäki Saparmyrat Türkmenbaşy adyndaky ýöriteleşdirilen umumybilim berýän mekdep-internatynyň 11-nji synp okuwçysy Taňryguly Geldimämmedow, Balkan welaýatynyň Balkanabat şäheriniň Jebel şäherçesindäki 8-nji orta mekdebiniň 10-njy synp okuwçysy Weýselhajy Nureddinow, Mary welaýatynyň Sakarçäge etrabynyň Şatlyk şäherindäki takyk we tebigy ugurlardan ýöriteleşdirilen 43-nji orta mekdebiniň 10-njy synp okuwçysy Azat Amansähedow, Aşgabat şäherindäki 86-njy ýöriteleşdirilen orta mekdebiniň 11-nji synp okuwçysy Döwletmyrat Arazow dagy IV oýnuň ýeňijileri diýlip yglan edildiler. Ýeňijiler we bäsleşige gatnaşyjylar hemaýatkärler tarapyndan taýýarlanylan gymmat bahaly ýadygärlik sowgatlary hem-de Türkmenistanyň Daşary işler ministrliginiň Halkara gatnaşyklary institutynyň Hormat hatlary bilen sylaglandylar.
«Parahatçylygyň ýaş çaparlary» atly akyl-paýhas bäsleşiginiň II möwsüminiň I saýlama tapgyrynyň IV oýny «Miras» teleýaýlymy bilen okuw studiýasy tarapyndan bilelikde ýazgy edildi. Bäsleşik ýakyn günlerde «Miras» teleýaýlymynda tomaşaçylara ýetiriler.
