Girmek
28-nji fewralda Aşgabada sapar bilen gelen Ysraýyl Döwletiniň Daşary işler ministrliginiň Ýewraziýa we Günbatar Balkan ýurtlary bölüminiň ýolbaşçysy Ýuwal Fursah bilen Türkmenistanyň daşary işler ministriniň orunbasary B.Mätiýewiň arasynda duşuşyk geçirildi. Bu barada TDIM-niň resmi web-saýtynda habar berilýär.
Çeşmäniň habar bermegine görä, gepleşikleriň dowamynda türkmen-ysraýyl gatnaşyklarynyň, şol sanda syýasy-diplomatik, söwda-ykdysady we medeni-ynsanperwer ulgamlarynda ikitaraplaýyn hyzmatdaşlygyň berkidilmegi meseleleri ara alnyp maslahatlaşyldy. Taraplar halkara we sebit guramalarynyň çäklerinde köptaraplaýyn hyzmatdaşlygyň oňyn tejribesi barada bellediler.
Duşuşygyň dowamynda diplomatlar Türkmenistan bilen Ysraýylyň arasynda ýola goýlan gatnaşyklaryň, şeýle-de geljekde ýola goýuljak köpugurly hyzmatdaşlyklaryň mundan beýläk hem giňeldilmegine we pugtalandyrylmagyna özara ygrarlydyklaryny tassykladylar we iki ýurduň arasyndaky dostlukly gatnaşyklarynyň has-da gülläp ösmegini arzuw etdiler.