Türkmenistanly agyr atletikaçy Gülnabat Kadyrowa şu günler Bahreýnde geçirilýän Aziýanyň çempionatynda zenanlaryň arasynda 71 kilograma çenli agram derejesinde kümüş medala mynasyp boldy.
Kadyrowa ştangany götermegiň iki görnüşiniň jemi boýunça 219 kilogramlyk netije görkezdi. Onuň silterläp götermekdäki netijesi 102, iteklemekde bolsa 117 kilograma ýetdi. Bu agram derejesinde hytaýly Ýan Sýusýa (228 kilogram; 106+122) Aziýanyň çempiony boldy. Ilkinji üçlügi 210 kilogram agyrlygy eýgerip (99+116), mongiliýaly Anuujin Ganzorig jemledi.
Şeýlelikde, Türkmenistan Manama şäherinde geçirilýän Aziýanyň çempionatynda ikinji medalyny gazandy. Mundan ozal zenanlaryň arasynda 49 kilograma çenli agram derejesinde ýaryşan Ýulduz Jumabaýewa bürünç medala mynasyp bolupdy.
Bahreýndäki yklym çempionaty 16-njy oktýabrda tamamlanar.
