Girmek
54-nji Halkara Mendeleýew himiýa olimpiadasynda türkmenistanly mekdep okuwçylary 4 medal gazandylar. Halkara onlaýn olimpiadany Moskwa döwlet uniwersitetiniň we Olimpiýa guramaçylyk komitetiniň alymlar topary gurady.
Bu ýyl Halkara olimpiada 27 ýurtdan 131 okuwçy gatnaşdy. Halkara Mendeleýew himiýa olimpiýadasy bu ýyl onlaýn geçirilendigi sebäpli, diňe 1-nji we 2-nji teoretiki tapgyrlar geçirildi. Amaly tapgyr geçirilmedi. Türkmenistanly mekdep okuwçylary bu iri halkara bäsleşikde iki kümüş we iki bürünç medal gazanmagy başardy.
Bäsleşigiň netijelerine görä, Aýratyn zehinli çagalaryň Döwlet mekdep-internatynyň 10-njy synp okuwçysy Berdigylyç Rejepbaýew kümüş medal, Aşgabat şäherindäki iňlis dili, himiýa we biologiýa derslerini çuňlaşdyryp öwredýän 86-njy orta mekdebiň 9-njy synp okuwçysy Dawut Muhammetgulyýew kümüş medal, Aýratyn zehinli çagalaryň Döwlet mekdep-internatynyň 10-njy synp okuwçysy Ýusup Döwletmyradow bürünç medal, mekdep-internatynyň 9-njy synp okuwçysy Gözel Döwranowa bürünç medal gazanmagy başardy.
Topara Aýratyn zehinli çagalaryň Döwlet mekdep-internatynyň himiýa mugallymy Nazar Mämmedow ýolbaşçylyk etdi.