Login
Özbegistanyň meşhur estrada dueti «Farhod we Şirin» beýik türkmen akyldary we şahyry Magtymguly Pyragynyň «Habar ber — şeýledir» atly goşgusyna döredilen täze aýdymy köpçülige tanyşdyrdylar. Bu barada HHM habar berdi.
Magtymgulynyň goşgulary Merkezi Aziýanyň halklarynyň arasynda, şol sanda Özbegistanda-da meşhurdyr. Özbek aýdymlarynyň ençemesi Magtymgulynyň goşgulary esasynda döredilip, olar Muhiddin Kori Ýokubow, Orif Alimahsumow, Komiljon Otaniýozow, Fahriddin Umarow ýaly aýdymçylar tarapyndan ýerine ýetirildi.
Ýeri gelende bellesek, bu ýyl Özbegistanda hem Prezident Şawkat Mirziýoýewiň gol çeken kararyna laýyklykda, Magtymguly Pyragynyň doglan gününiň 300 ýyllygy giňden belleniler.
Mundan ozal «Farhod we Şirin» dueti Türkmenistanda Özbegistanyň Medeniýet günleriniň çäginde we beýleki çärelerde, hususan-da, Aşgabatda geçirilen Ýapyk binalardaky we söweş sungaty boýunça V Aziýa oýunlarynyň ýapylyş dabarasynda uly üstünlik bilen çykyş edipdi.