Ylgaýanlaryň arasynda sorag geçirenimizde olaryň 20 göteriminiň horlanmak, agramyny ýeňletmek üçin ylgaýandyklaryny kesgitledik. Eýsem kadadan artykmaç agram nireden, nämeden emele gelýär?
Köpler horluga ýa-da semizlige nesil yzarlaýan alamat hökmünde seredýärler. Şeýle pikire ynanýanlar bilen azajyk ylalaşsa bolar, ýöne agyr agramyň esasy sebäbi işdä bilen kaloriýaly iýmitiň köp iýilip, az hereket edilmegindedir. Artykmaç agram lukmanlaryň öňünde-de uly mesele bolup durýar. Agramyň artmagy ýürek keselleriniň ýaýramagyna, gan basyşynyň ýokarlanmagyna, süýji keselleriniň döremegine getirýär. Agramy bolmaly ýagdaýyndan 13 kilogram köp gelýän adamyň ýüreginde, myşsalarynda, damarlarynda dert köpelip, günüň dowamynda ýarty halta ýeralma göterip gezen ýaly bolýar
Köp iýmegiň, hereket ýetmezçiliginiň ösen ýurtlar üçin häzirki döwürde iň uly mesele bolup durýandygyny alymlarymyz, soziologlarymyz kesgitlediler. Köpleri haýsy agramy, göwräniň,ýaşyň üçin iň amatlysy hasaplap bolar diýen sorag gyzyklandyrýar. “Siziň üçiniň gowy agram siziň ýaş wagtyňyzda özüňizi oňat duýýan wagtyňyzdaky agramyňyzdyr”- diýip A.Lidýard belleýär. Şol agramy bütin ömrüňiziň dowamynda saklamaga çalyşmaly.