Tapgyryň umumy aýratynlyklary:
Ýene minimal hasaplar: Bäşinji tapgyr hem dördünji tapgyra meňzeş boldy. Duşuşyklaryň üçüsi hem haýsydyr bir toparyň ýeňşi bilen tamamlandy. Ýöne ýeňijilere garşydaşlaryndan has öňe saýlanmak bu gezek he başartmady. Duşuşyklaryň üçüsinde-de ýekeje pökginiň artykmaçlygy toparlara ýeňiş getirdi.
Utuklar: «Ahal» 4/12, «Şagadam» 4/7, «Köpetdag» 4/6, «Energetik» 4/6, «Nebitçi» 5/6, «Altyn asyr» 2/4, «Merw» 4/3, «Aşgabat» 5/3.
27 golçy: Şu tapgyrda iki futbolçy möwsümdäki ilkinji gollaryny geçirdiler. Şeýlelikde, Ýokary liganyň 27-nji möwsüminde tapawutlanan futbolçylaryň sany 27-ä çykdy.
3 duşuşykda 5 gol: Tapgyryň 3 duşuşygy 5 gol bilen tamamlandy. Elbetde, «Merw» ― «Altyn asyr» duşuşygy heniz ätiýaçda.
5 tapgyrda 37 gol: Möwsümiň yzda galan 5 tapgyrynda derwezelere 37 pökgi geçirildi.
Täk tapgyrlarda jübüt döredi: Henize çenli möwsümde bäş futbolçy bir duşuşykda iki gezek tapawutlanyp bildi. Täsin şol pökgüleriň ählisini täk sanly tapgyrlarda geçirildi. Has takygy, 1-nji tapgyrda üç, 3-nji we 5-nji tapgyrlaryň hersinde bir futbolçy iki gezek tapawutlandy.
“Şagadam” – “Ahal” – 0:1
Gol: 57 Didar Durdyýew (“Ahal”)
5 tapgyrdan soň 5 utuk tapawudy: Tapgyrda ýaryş tertibinde ikinji orunda barýan «Şagadamy» ýeňip, utugyny 12-ä çykaran «Ahal» 5-nji tapgyrdan soň, iň ýakyn bäsdeşinden 5 utuk öňe saýlandy.
10 utukdan geçen ilkinji topar: «Ahal» şu möwsümde 10 utuklyk sepgitden geçen ilkinji topar boldy.
Bäsdeşlerinden iki esse öňde: «Ahal» möwsümde dördünji ýeňşini gazandy. AFK-nyň duşuşyklaryna gatnaşýandygy sebäpli, täze möwsümde diň iki oýun geçiren «Altyn asyry» hasaba almazdan, «Ahalyň» beýleki garşydaşlarynyň ählisinden diňe ýeňişleriň sany boýunça-da iki esse ýokary netije görkezendigini nygtamak gerek. Ýokary liganyň dört toparynda iki, galan üç toparynda bir ýeňiş bar.
Ilkinji gezek ýeňildi: «Şagadam» şu möwsümde ilkinji gezek ýeňildi. Indi Ýokary ligada diňe «Ahal» bilen «Altyn asyrda» utulyş ýok.
Didar Durdyýew birinji orna dalaşgär: Möwsümdäki üçünji pökgüsini geçiren Didar Durdyýew «Altyn asyrdan» Myrat Ýagşyýew bilen bilelikde häzir iň netijeli futbolçylaryň bäsleşiginde birinji orunda.
“Köpetdag” – “Aşgabat” – 2:1
Gollar: 41, 65 Batyrgylyç Berdiýew (“Köpetdag”) – 86 Şatlyk Gurbanow (“Aşgabat”)
Ikisi-de ilkinji gezek: Şu duşuşykda tapawutlanan futbolçylaryň ikisi hem şu möwsümdäki ilkinji pökgülerini geçirdiler.
Ýokary ligada ilkinji gol: Şatlyk Gurbanow şu tapgyrda Ýokary ligadaky ilkinji pökgüsini geçirdi. Şeýlelikde, 2012-nji ýyldan bäri (biziň hasaplamalary ýöredip gelýän ýylymyzdan bäri) Ýokary ligada tapawutlanan futbolçylaryň sany 270-e tegelendi.
“Energetik” – “Nebitçi” ― 1:0
Gol: 63 Pirmyrat Gazakow (“Energetik”)
«Energetik» 50-nji ýeňşini gazandy: Ýokary ligada 2015-nji ýylyň futbol möwsüminden bäri çykyş edýän «Energetik» dört möwsümde 50-nji ýeňşini gazandy. Şol ýeňişleriň 5-si 2015-nji, 20-si 2016-njy, 11-si 2017-nji, 12-si 2018-nji galan ikisi bolsa şu ýyla degişli. «Energetik» Ýokary liganyň taryhynda iň köp ýeňiş gazanan toparlaryň arasynda 13-nji orunda. 12-nji orundaky «Büzmeýniň» yzyndan ýetmek üçin «energetiklere» ýene 17 ýeňiş gerek.
«Merw» ― «Altyn asyr» (28-nji maýa geçirildi)