17-27-nji sentýabr aralygynda Aşgabat şäherinde geçiriljek Ýapyk binalarda we söweş sungaty boýunça V Aziýa oýunlarynyň tennis boýunça ýaryşynda Taýlandyň tennis topary medallara dalaş etmäge mynasyp türgenleriniň hatarynda bolarlar.
Merkezi Aziýa sebitinde geçiriljek iň uly sport ýaryşyna ugramakdan öň ahyrky taýýarlyk çäreleriniň çäginde taýlandly tennisçiler Kuala Lumpurdaky Günorta-gündogar Aziýa oýunlarynda öz ussatlygyny görkezdiler.
Bäş dissiplina boýunça ýaryşlaryň dördüsinde dört altyn, iki kümüş we üç bürünç medallaryň eýesi bolan Taýlandyň tennis topary her iki ýyldan bir gezek geçirilýän sebitleýin ýaryşda öňe saýlandy we Aşgabat 2017-ä taýýardygyny hemmä subut etdi.
Niça Lerpitaksinçaý we Sançaý Ratiwatana garyşyk jübütleriň arasyndaky ýaryşda altyn medal alyp, öňe saýlandylar. Soňra zenanlaryň we erkekleriň arasynda jübütleýin dissiplinada çykyş etdiler we ýene-de münberiň iň ýokarky basgançagyny eýelediler. Şeýlelikde, Taýland Günorta-gündogar Aziýa sebitiniň sportuň şu görnüşi boýunça özleriniň öňdebaryjy topardygyny görkezdiler.
Mundan başga-da, taýlandly türgenler 2015-nji ýylda geçirilen Günorta-gündogar Aziýa oýunlarynda-da ýedi dissiplina boýunça geçirilen ýaryşyň altysynda altyn medallaryň eýeleri bolmagy başardylar we diňe garyşyk jübütleriň arasyndaky ýaryşda filippinli jübütden utulyp, kümüş medal aldylar.
Bu ýylyň ýaryşynda Indoneziýadan gelen Kristofer Rungkat erkekleriň arasynda şahsy ýaryşyň final tapgyrynda taýlandly Jirat Nawasirisombundan üstün çykyp, altyn medala mynasyp boldy.
Finalda 6-4, 6-4 hasap bilen ýeňlen Jirat şeýle diýdi: “Bu oýun meniň üçin aňsat bolmady. Ýeňlenime gynanýaryn. Emma bürünç medal alyp bilsem bolýar diýip ýören halyma kümüş medala mynasyp bolmagym meni begendirýär”.
Tennisde ýeňiji bolan taýlandly türgenleriň biri Luksika Kumhum häzirki wagtda dünýä sanawynda 180-njy orny eýeleýär. Ol geljekki ABŞ-nyň açyk çempionatyna gatnaşmak üçin saýlama tapgyrlaryna gatnaşman, Günorta-gündogar Aziýa oýunlarynda çykyş etmegi makul bildi. Final garşydaşy filippinli Anna Klaris Patrimoniodan tapgyrda 6-0, 6-1 hasap bilen üstün çykan Luksika şeýle diýdi: “Men Günorta-gündogar Aziýa oýunlarynda zenanlaryň arasynda şahsy ýaryşda ilkinji altyn medalymy alanyma bagtly duýýaryn. ABŞ-nyň açyk çempionatyna gatnaşmaga mümkinçiligi elimden gidirenime gynanýaryn. Finalyň hasabyny eşidenleriň ýeňiş aňsat bolandyr diýip pikir etmegi mümkin, emma bu beýle däl. Ýeňmek aňsat bolmady. Bu meniň Anna bilen oýnan ilkinji oýnum”.
Zenanlaryň arasynda jübütleýin ýaryşda Niça ildeşi Peangtarn Plipueç bilen bir kortda çykyş edip, watandaşlary Luksika we Noppawan Lertçikawarndan garşy üç set dowam eden finalda üstün çykdylar. Birinji setde 6-1 hasap bilen ýeňlip we ikinji setde 6-3 hasap bilen üstün çykyp, bu jübüt dartgynly ýagdaýda geçen üçinji setde 10-8 hasap bilen ýeňiş gazandy.
Soňra Niça Sançaý bilen çykyş edip, garyşyk jübütleriň arasynda finalda 6-1, 6-2 hasap bilen indoneziýaly Rungkaty we Jessi Rompizi ýeňmegi başardy we bu Oýunlarda ikinji altyn medala mynasyp boldy.
Sançaý hem öz gezeginde iki altyn medalyň eýesi boldy. Ol öz ekiz dogany Sonçat bilen bilelikde filippinli Keýsi Alçantara we Ruben Gonzaleze garşy finalyň üçinji seti 10-7 hasap bilen ýeňdiler. Şeýlelikde, Taýlandyň tennisçileri özlerini ussat türgenler hökmünde tanatdylar we Aşgabat 2017-niň tennis boýunça ýaryşlarynda ünsi özüne çekjek toparlaryň biri bolarlar.
