Türkiýäniň Stambul şäherinde 23-nji aprelde bolan güýçli ýertitremede 151 adam ejir çekdi diýip, şäheriň häkimiýetleri habar berdi. Ejir çekenlere lukmançylyk kömegi berilýär diýip, «MIR 24» ýazýar.
Güýji 6,2 bala ýeten hadysanyň çuňlugy 7 kilometr töweregi boldy. Tebigy betbagtçylyklaryň öňüni almak boýunça edaranyň (AFAD) maglumatlaryna laýyklykda, ýer yranmasy sagat 12:49-da Stambulyň kenarýakasyndaky Mermer deňzinde hasaba alyndy, ol ýerde 51 sarsgyn boldy. Iň güýçli sarsgyn 13 sekunt töweregi dowam etdi.
Ýertitreme wagty diwarlar yrandy, çyralar çaýkandy, mebel jygyldady, elektrik togy wagtlaýyn öçdi, internete girmekde bökdençlikler ýüze çykdy. Stambulda konsertler we beýleki çäreler ýatyryldy.
