Türkmen halkynyň Milli Lideri Arkadag şäherine iş saparyny amala aşyrdy, Haýyr-sahawat gaznasynyň bejeriş işleri boýunça wise-prezidenti Ahal welaýatynyň birnäçe lukmançylyk edaralaryna baryp gördi, «Arkadag» futbol kluby AFK-nyň Çagyryş ligasynyň finalyna çykdy we beýleki habarlar
Türkmenistanda
1. Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow Arkadag şäherine iş saparyny amala aşyryp, bu ýerde Howandarlyga mätäç çagalara hemaýat bermek boýunça haýyr-sahawat gaznasynyň wise-prezidentleri Oguljahan Atabaýewanyň we Rejep Bazarowyň gatnaşmagynda iş maslahatyny geçirdi. Iş maslahatynyň dowamynda wise-prezidentler Gazna tarapyndan alnyp barylýan işler we ony mundan beýläk-de ösdürmegiň ugurlary barada hasabatlary berdiler. Oguljahan Atabaýewa ýurduň saglygy goraýyş ulgamyny kämilleşdirmek, lukmançylyk edaralaryna öňdebaryjy usullary we sanly tehnologiýalary ornaşdyrmak boýunça birnäçe başlangyçlary teklip etdi.
2. Rejep Bazarow Gaznanyň müdiriýetiniň agzalarynyň daşary ýurtlara saparlaryny guramak we ilkinji sapary Özbegistan Respublikasyna amala aşyrmak baradaky teklibi öňe sürdi. Gurbanguly Berdimuhamedow bu teklibi oňlap, halkara hyzmatdaşlygynyň we tejribe alyş,agyň ähmiýetine ünsi çekdi.
3. Şol gün Haýyr-sahawat gaznasynyň bejeriş işleri boýunça wise-prezidenti Oguljahan Atabaýewa Ahal welaýaty boýunça iş saparyny amala aşyryp, çagalary bejermäge we olaryň saglygyny dikeltmäge ýöriteleşen lukmançylyk edaralarynyň birnäçesine baryp gördi. Saparyň dowamynda O.Atabaýewa welaýatyň Saglygy dikeldiş okuw-terbiýeçilik toplumynda, Köpugurly hassahanasynda hem-de Enäniň we çaganyň saglygyny goraýyş merkezinde alnyp barylýan işler bilen tanyşdy. Mümkinçiligi çäkli bolan çagalaryň saglygyny dikeltmegiň häzirki zaman usullaryna we olaryň sazlaşykly ösmegi üçin zerur şertleri döretmäge aýratyn üns çekildi.
4. Türkmenistanyň ilçisi Ata Annaýew Horwatiýanyň Medeniýet we metbugat ministrliginiň Halkara medeni hyzmatdaşlyk müdirliginiň direktory Anýa Ýelawiç bilen duşuşdy. Duşuşykda iki ýurduň arasyndaky medeni hyzmatdaşlygyň meseleleri boýunça pikir alşyldy. Taraplar Horwatiýada Türkmenistanyň Medeniýet günlerini geçirmegiň, şeýle hem Magtymguly Pyragynyň doglan gününiň 300 ýyllygynyň baýram edilmegi bilen baglylykda degişli çäreleri guramagyň mümkinçiliklerini ara alyp maslahatlaşdylar. Türkmen tarapy horwat wekiliýetini şu ýyl Türkmenistanda geçiriljek halkara festiwallara gatnaşmaga çagyrdy.
https://turkmenportal.com/blog/90050/v-respublike-horvatiya-provedut-dni-kultury-turkmenistana
5. Hytaýyň Türkmenistandaky ilçihanasy Döwletmämmet Azady adyndaky Türkmen milli dünýä dilleri instituty bilen bilelikde 16-njy Halkara hytaý diliniň gününe bagyşlap, mowzuklaýyn çäre geçirer. Maksatnamanyň çäklerinde myhmanlar üçin hytaý medeniýetine bagyşlanan sergi guralar. Hytaý dilinde sözleýiş ussatlygynyň bäsleşiginiň we medeni çykyşlaryň göni ýaýlymda berilmegi çäräniň esasy aýratynlygy bolar.
https://turkmenportal.com/blog/90047/v-turkmenistane-otmetyat-mezhdunarodnyi-den-kitaiskogo-yazyka
Dünýäde
1. Mýanmanyň demirgazyk sebitleri ýakynda bolup geçen weýrançylykly ýertitremeden dikeldilip ýetişmänkä täze tebigy betbagtçylyk – güýçli suw joşmasy bilen ýüzbe-ýüz boldy. Ýurduň ikinji uly şäheri bolan Mandalaýda köçeler suw astynda galdy. Ýertitremeden aman galan binalar indi suwuň güýjüne döz gelip bilmeýärler. Ilatyň weýrançylykly ýertitremeden ýaňy özüne gelip başlan wagty Günorta-Gündogar Aziýanyň bu sebitine doly bilen bilelikde güýçli ýagyş ýagdy. Indi öýlerini ýitiren müňlerçe adam yzygiderli ýagyşdan gaçybatalga gözlemäge mejbur bolýar. Meteorologlaryň çalamalaryna görä, sebitde güýçli ýagyş azyndan ýene bir gün dowam eder.
https://turkmenportal.com/blog/90045/posle-zemletryaseniya-myanmu-nakrylo-navodnenie
2. Kokteýl üçin iň ýokary baha boýunça dünýä rekordy Dubaýa degişlidir, bu ýerde şeýle içgi 42 müň dollardan gowrak baha satyldy. Kokteýl auksionda satyn alyndy, onuň başlangyç bahasy 16 müň dollardan başlapdy. Bu içgi seýrek önümler peýdalanylyp, şol sanda tekilanyň diňe bu waka üçin döredilen ýörite brendi goşulyp döredildi. 1937-nji ýylda öndürilen we ozal muzeýde saklanan «Baccarat» bulgurlary hem aýratyn gymmatlyk döredýär. Restoranyň wekili bu bulgurlaryň Parižden ýörite getirilendigini we ozal ulanylmandygyny aýtdy. Bagtly müşderi olary ýadygärlik sowgat hökmünde aldy. Şol gün Dubaýda bahasy üç müň dollardan gowrak alkogolsyz kokteýl hem hödürlendi. Onuň düzüminde ter klýukwa, narpyz, nar şiresi, deňiz duzy we iýip bolýan 24 karatlyk altyn bar. Içginiň ýany bilen iýilýän altyn bilen bezelen ajaýyp iýmitler berilýär.
https://turkmenportal.com/blog/90031/samyi-dorogoi-kokteil-v-mire-byl-prodan-v-dubae
Sport täzelikleri
1. «Arkadag» futbol kluby AFK-nyň Çagyryş ligasynyň ýarym final tapgyrynda Kuweýtiň «Al-Arabi» toparyny 3:0 hasabynda ýeňlişe sezewar etdi. Duşuşyk çarşenbe güni «akylly» şäherde geçirildi. Ýeňijileriň düzüminde Şanazar Tirkişow iki gol geçirdi, ýene bir goly Altymyrat Annadurdyýew saldy. 9-njy aprelde El-Kuweýtde geçirilen birinji duşuşykda Wladimir Baýramowyň şägirtleri 0:2 hasabynda ýeňlipdiler. Iki duşuşygyň jemine görä «Arkadag» AFK-nyň Çagyryş ligasynyň finalyna çykdy. Ýaryşyň final oýny 10-njy maýda geçiriler, «Arkadagyň» garşydaşy 17-nji aprelde belli bolar. Aýgytly oýnuň geçiriljek ýeri heniz kesgitlenmedi.
https://turkmenportal.com/blog/90054/arkadag-razgromil-alarabi-i-vyshel-v-final-ligi-vyzova-afk
