Golaýda Malaýziýanyň Kuala-Lumpur şäherinde Merkezi Aziýanyň Futbol assosiasiýasynyň (MAFA) 10-njy ýubileý Kongressi geçirildi. Oňa MAFA-nyň agzasy bolan ýurtlaryň futbol federasiýalarynyň, şol sanda Türkmenistanyň Futbol federasiýasynyň ýolbaşçylary gatnaşdylar. Bu barada stadion.uz özbek saýty ýazýar.
Kongressde sebitleýin hyzmatdaşlygyň täze derejä çykandygy bellenilip, MAFA-nyň çäginde dürli derejedäki ýaryşlary guramaçylykly we yzygiderli geçirmekligiň zerurdygyna üns çekildi.
Mundan başga-da, hyzmatdaşlygyň ileri tutulýan ugry hökmünde sebitiň döwletleriniň futbolyna döwrebap tehnologiýalary we tejribeleri ornaşdyrmak meselesi ara alnyp maslahatlaşyldy. Şunuň bilen baglylykda, MAFA-nyň başlangyjy bilen FIFA-nyň we AFK-nyň maksatnamalary esasynda okuw sapaklaryny, nazary-amaly türgenleşikleri dowam etdirmek barada ylalaşyldy.
