Eýran Yslam Respublikasynyň Türkmenistandaky Medeniýet merkezinde pars şygryýetine we edebiýatyna, şeýle-de meşhur eýran şahyry Seýid Muhammet Hüseýin Şahriýaryň hatyrasyna bagyşlanan çäre geçirildi. Bu çärä öňdebaryjy türkmen ýokary okuw mekdepleriniň «Pars dili we edebiýaty» hünäri boýunça bilim alýan talyplary, olara sapak berýän mugallymlary, diplomatlar we medeni jemgyýetçiligiň wekilleri gatnaşdylar.
Eýran Yslam Respublikasynyň Türkmenistandaky ilçisi Ali Mojtaba Ruzbahani öz çykyşynda pars edebiýatynyň baý mirasynda we täsirine ünsi çekdi, şeýle-de pars diliniň Yslam dünýäsiniň ikinji dili hökmündäki ähmiýetini belläp geçdi. Ol Şahriýaryň pars poeziýasynyň ösmegine goşan goşandyny aýratyn belläp, 17-nji sentýabryň bu görnükli şahyryň hatyrasyna Pars şygryýetiniň we edebiýatynyň milli güni diýlip yglan edilendigini ýatlady.
Ilçihananyň medeni meseleler boýunça geňeşçisi Nawid Rasuli pars edebiýatynyň ählumumy adamzat gymmatlyklarynyň ýaýramagynda uly orna eýedigini nygtady. Şeýle-de eserlerinde pars poeziýasynyň däp-dessurlaryny mynasyp dowam etdirýän türkmen şahyry Magtymguly Pyragynypň doglan gününiň 300 ýyllygy barada hem aýratyn durup geçdi.
Türkmen ýokary okuw mekdepleriniň wekilleri ýurtda pars dilini we edebiýatyny öwretmegiň ösüşi barada çykyş edip, munuň Türkmenistan bilen Eýranyň arasyndaky medeni gatnaşyklaryň has-da işjeňleşmeginde möhümdigini bellediler.
