Şu gün Gazagystanda Türkmenistanyň Medeniýet günleriniň açylyş dabarasy boldy.
Baýramçylygyň çäginde Kalibek Kuanyşbaýew adyndaky Gazagystanyň milli aýdym-sazly we drama teatrynda Türkmenistanyň sungat ussatlarynyň konserti geçirildi. Bu barada Türkmenistanyň Gazagystandaky ilçihanasynyň Metbugat gullugy habar berdi.
Şol bir wagtyň özünde aýdym-sazly we drama teatrynyň eýwanynda Türkmenistanyň amaly-haşam, surat we muzeý gymmatlyklarynyň sergisi açyldy.
Bir gün öň, 24-nji iýunda gazagystanly tomaşaçylara türkmen şahyry Magtymguly Pyraga bagyşlanan «Istärin» atly çeper film görkezildi.
Ertir Türkmenistanyň amaly-haşam we muzeý gymmatlyklarynyň sergisi K.Kuanyşbaýew adyndaky teatrda dowam etdiriler we türkmen modasynyň sergisi bolar. Şol günki maksatnamanyň çäginde «Gyzyl alma» atly türkmen çeper filmi görkeziler.
Çeşmäniň habaryna görä, 27-nji iýunda Gazagystanda Türkmenistanyň Medeniýet günleri Türkmenistanyň we Gazagystan Respublikasynyň iň oňat döredijilik toparlarynyň gala konserti bilen tamamlanar.
