Ahal welaýatynyň Sarahs etrabynyň Ata oba geňeşliginde ýewropanyň öňdebaryjy kompaniýalarynyň enjamlary bilen enjamlaşdyrylan we iň ýokary hil talaplaryna laýyk gelýän awtoulaglara ýangyç guýýan häzirkizaman stansiýa işe girizildi. Tejen – Sarahs gara ýolunyň ugrunda ýerleşen täze AÝGS gije-gündiziň dowamynda dürli kysymly awtoulaglaryň 750-den gowragyna ýangyç guýmaga niýetlenendir.
Täze stansiýada ýangyç guýýan häzirkizaman enjamlary oturdylyp, olar ýeňil hem ýük awtoulaglaryna, awtobuslara we beýleki tehnikalara awtomobil ýangyjynyň dürli görnüşlerini — A-80, A-92 we A-95, şeýle hem, dizel ýangyjyny tiz guýmaga hem-de ýokary hilli hyzmat etmäge mümkinçilik berýär. Ikitaraplaýyn amatly girelgeleri ýangyç guýýan dört sany enjama birbada sekiz awtoulaga hyzmat etmäge mümkinçilik berýär.
Täze stansiýada ýangyjy saklamagyň hem-de ony guýmagyň tehnologiki tapgyrlary dolulygyna kompýuterleşdirilip, ähli howpsuzlyk talaplaryna, şol sanda ýurtda gurlup ulanylmaga berilýän ähli obýektler üçin iň ilkinji nobatda durýan ekologiki talaplara laýyk gelýär.
Şeýle-de, bu ýerde awtoulaglara tehniki taýdan hyzmat etmäge niýetlenen nokadyň bolmagy sürüjiler üçin goşmaça amatlyklary döredýär.
AÝGS-iň gurluşygyny «Türkmennebitönümleri» Baş müdirliginiň hojalyk hasaplaşygyndaky Abatlaýyş-gurluşyk müdirliginiň Ahal welaýat bölüminiň hünärmenleri amala aşyrdy. Awtoulaglara ýangyç guýýan stansiýanyň gurlup ulanylmaga berilmegi şol ýeriň sürüjileriniň ýangyç bilen üpjünçiligini has hem ýokarlandyrmaga ýardam eder.
Täze AÝGS — Sarahs etrapynda häzirki wagtda hereket edýän awtoulaglara ýangyç guýýan dört stansiýanyň biridir. 2015-nji ýylda «Türkmennebitönümleri» Baş müdirliginiň hünärmenleriniň zähmeti netijesinde Türkmenistanyň Ahal, Mary, Lebap we Balkan welaýatlarynyň dürli etraplarynda 10 sany täze AÝGS gurlup ulanylmaga berildi.