Türkmen türgenleri şu ýylyň 15 — 18-nji maýynda Kanadada geçiriljek kýokuşinkaý karate boýunça dünýä çempionatynda çykyş ederler.
Häzirki wagtda Türkmenistanyň milli ýygyndy topary Aşgabat şäheriniň Bedenterbiýe we sport naradaky Baş müdirliginiň «Täze Zaman» bedenterbiýe-sagaldyş toplumynda ykjam türgenleşik geçýär. Türgenleşikleriň tertibi ýokary derejede alnyp barylýar. Hepdäniň alty gününde ir bilen hem-de agşam geçilýän türgenleşikleriň her biri iki sagatlap dowam edýär.
Karateçileri Myrat Ekäýew taýýarlaýar. Ol şu wezipede 2013-nji ýyldan bäri zähmet çekýär. Halypa tälimçi şol döwürde dürli derejedäki halkara ýaryşlaryň ýeňijileriniň ençemesini taýýarlady. Hünärmen sportuň şu görnüşinde türgenleşikleriň iň möhüm böleginiň talap bolup durýandygyny belleýär. Tälimçi şägirtleriňe sportuň bu görnüşiniň inçe tilsimlerini içgin öwretmegiň zerurlygyny hem nygtady.
Asly Koreýadan bolan ýaponiýaly ussat Masutasu Oýama tarapyndan esaslandyrylan kýokuşinkaý karate berk aragatnaşyk usuly bilen tapawutlanýar. Galtaşykda alnyp barylmaýan söweş sungatlarynyň köpüsinden tapawutlylykda, bu ýerde hakyky täsir güýji doly galtaşmakdaky emellerde görkezilýär.
Ýeri gelende bellesek, Türkmenistanda 1500-den gowrak adam kýokuşinkaý karate bilen meşgullanýar. Bu görnüş ýaşlaryň arasynda has hem meşhurdyr. Söweş sungatydygyna garamazdan, bu görnüş çagalaryň arasynda-da uly meşhurlyga eýedir.
Häzirki wagtda ýurdumyzda 40-dan gowrak tälimçi sportuň şu görnüşini saýlan ýaşlary ykjam taýýarlamak boýunça zähmet çekýärler. Türkmenistanyň Kýokuşinkaý karate merkezi 1993-nji ýyldan bäri hereket edýär.
