Türkmenistanyň Minstrler Kabinetiniň 20-nji noýabrda geçirilen mejlisinde Türkmenistanyň Prezidenti Gurbanguly Berdimuhamedowa 2017-nji ýylda Aşgabatda geçiriljek Ýapyk binalarda we söweş sungaty boýunça V Aziýa oýunlaryna görülýän taýýarlygyň barşy hakynda hasabat berildi.
Häzir bu oýunlaryň ýokary guramaçylyk derejesini üpjün etmäge gönükdirilen toplumlaýyn çäreler görülýär, iri halkara ýaryşlaryny geçirmek boýunça öňdebaryjy dünýä tejribesi öwrenilýär.
Şeýle-de, Ýerine ýetiriji komitetiň Türkmenistanyň Magtymguly adyndaky Ýaşlar guramasynyň Merkezi geňeşi hem-de ýurdumyzyň Senagatçylar we telekeçiler birleşmesi bilen bilelikde taýýarlan Aziadanyň şygarlary boýunça teklipler döwlet Baştutanynyň garamagyna hödürlenildi.
Prezident Gurbanguly Berdimuhamedow Aziada — 2017-niň şygarlary boýunça teklipler bilen tanşyp, “Sagdynlyk. Ruhubelentlik. Dostluk.” diýen şygarda oýunlaryň esasy maksady—Sagdyn durmuş ýörelgesine we sport bilen meşgullanmaga, dünýäniň döwletleriniň hem-de halklarynyň arasynda dostlukly, hoşniýetli gatnaşyklary ruhy taýdan kämilleşdirmäge we berkitmäge bolan islegi höweslendirmek maksady öz beýanyny tapýar diýip nygtady.
