Türkmenistanyň Tennis federasiýasynyň metbugat gullugy 12 ýaş we ondan kiçi türgenleriň arasynda geçiriljek Merkezi Aziýanyň birinjiliginiň bijeleriniň 4-nji iýun güni Aşgabatdaky Olimpiýa şäherçesinde çekiljekdigini habar berdi.
Bije çekişlik dabarasy şol gün sagat 14:30-da başlanar. Şondan soň Türkmenistandan, Owganystandan, Gazagystandan, Gyrgyzystandan, Täjigistan we Özbegistandan körpe tennisçileriň gatnaşýan ýaryşynda kimiň kim bilen duşuşjakdygy belli bolar.
Ýaryşyň oglanlaryň we gyzlaryň arasynda geçiriljekdigini ýatladýarys. Ýaryşa 5-nji iýunda badalga berler we ol 9-njy iýunda tamamlanar.
Ýakynda ýaryşa gatnaşjak Türkmenistanyň ýygyndysynyň mälim edilendigini ýatladýarys.
Mundan dört ýyl ozal Aşgabatda geçirilen edil şeýle ýaryşda türkmen ýygyndysy bürüç medala mynasyp bolupdy.
