19-njy gezek geçirilýän Klublaryň arasyndaky dünýä çempionatynda birinji finalçy belli boldy. Ýarym finalda Braziliýanyň «Flamengo» toparyny 3:2 hasabynda ýeňlişe sezewar eden Saud Arabystanynyň «Al-Hilal» kluby ýaryşyň finalynda oýnamaga hukuk gazandy. Aziýanyň wekiline ýeňiş getiren gollaryň ikisini 4-nji we 45-nji minutlarda 11 metrlik jerime urgularyny dürs ýerine ýetiren Selim al Dosari, üçünjisini bolsa 70-nji minutda Lusian Wetto öz adyna ýazdyrdy. «Flamengonyň» jogap gollarynyň ikisine hem Pedro (4, 90+1) awtorlyk etdi.
«Al-Hilal» ýaryşyň finalynda «Al-Ahli» (Müsür) — «Real» (Ispaniýa) jübütiniň ýeňijisine garşy meýdança çykar. Ýarym finalyň ikinji oýny şu gün 23:59-da başlanar.
Ýeri gelende bellesek, «Al-Hilal» Klublaryň arasyndaky dünýä çempionatynda finala çykan Aziýanyň üçünji wekili boldy. Mundan ozal BAE-niň «Al-Aýn» (2016) we Ýaponiýanyň «Kaşima Antlers» (2018) toparlary ýaryşda finala çykmagy başardylar. Gyzykly tarapy, bu toparlaryň ikisi hem ýaryşyň finalynda «Realdan» ýeňlişe sezewar boldular.
