Aşgabadyň «Altyn asyr» futbol topary Ýokary liganyň 26-njy tapgyrynda Marynyň «Merwini» ýeňdi.
Aşgabatda geçirilen duşuşyk 1:0 hasabynda ýer eýeleriniň haýryna tamamlandy. Duşuşykdaky ýeke-täk pökgini birinji ýaryma goşulan wagtyň 2-nji minudynda hüjümçi Altymyrat Annadurdyýew geçirdi.
55 utukly «Altyn asyr» ýaryş tertibinde ikinji orny eýeleýär. Üçünji orundaky «Merwiň» bolsa 40 utugy bar.
«Ahal» futbol toparynyň eýýäm 25-nji tapgyrdan soň çempionlygyny yglan edip, Türkmenistanyň futbol çempionatynda «Altyn asyryň» 8 möwsümlik hökmürowanlygynyň soňuna çykandygyny habar beripdik. 26-njy tapgyrdaky ýeňiş bilen «Altyn asyr» hem möwsüm tamamlanmanka, ikinji ornundaky ýerini berkitdi. Indi diňe baýrakly orunlaryň üçünjisi üçin göreş dowam edýär.
Türkmenistanyň futbol boýunça milli çempionaty ýene-de iki tapgyrdan tamamlanar.
