Türkmenistanyň futbol çempionatynyň 16-njy tapgyrynyň çägindäki Mary derbisinde «Energetik» möwsümde ilkinji gezek «Merwden» üstün çykdy.
Mary şäherindäki «Energetik» stadionynda geçirilen duşuşykda ýerli topar «Merwi» 1:0 hasabynda ýeňdi. Duşuşykdaky ýeke-täk pökgini 82-nji minutda Musa Nurnazarow geçirdi.
Bu duşuşykdan soňra utugyny 12-ä çykaran «Energetik» möwsümde 10 utuklyk sepgide ýetip bilen ýedinji topar boldy. 23 utukly «Merw» dördünji orunda galsa-da galdy welin, bäşinjilikdäki «Şagadam» oňa 1 utuga çenli ýakynlaşdy. Şonuň üçin hem Mary şäheriniň topary ýagdaýdan netije çykarmasa, möwsümiň galan böleginde aşaky orunlara hem düşüp biler.
17-nji tapgyrda «Merw» «Aşgabady» kabul eder. «Energetik» bolsa «Ahalyň» myhmany bolar. Çempionatyň nobatdaky tapgyrynyň duşuşyklary 30-njy we 31-nji oktýabr günlerinde geçiriler.