Soňky habarlar

Arhiw

Türkmenistanly ýetginjek karate boýunça dünýä çempionatynda dört altyn medal gazandy

15:0610.09.2022
0
42110

Türkmenistanly ýaş karateçi Öwezmyrat Sapadurdyýew çehiýanyň Pardubise şäherinde geçirilýän şotokan karate boýunça 12-nji dünýä çempionatynda altyn medallaryň dördüsini gazandy ― diýip, «Türkmenistan: Altyn asyr» neşiri ýazýar.

31 döwletden türgenleriň 733-sini ýygnan dünýä çempionatynda karateniň kata we kumite görnüşleri boýunça dürli agram derejelerinde medallaryň 246 toplumy ugrunda göreş alnyp barylýar.

Dünýä çempionatynyň ilkinji gününde Gökdepe etrabynyň daşary ýurt dillerine ýöriteleşdirilen 1-nji orta mekdebiniň 5-nji synp okuwçysy Öwezmyrat Sapadurdyýew 10-11 ýaşly çagalaryň arasynda altyn medallaryň dördüsine mynasyp boldy.

Öwezmyrat her bir tutluşyk üçin 2 minut çemesi wagt sarp etdi. Tutluşyklarda gazanylan utuklar bolsa dürli-dürlüdir. Ol altyn medallary şobu ippon kumite (tutluşyk türgenleriň biri 2 utuk gazanýança dowam edýär), şobu sanbon kumite (tutluşyk 6 utuga çenli dowam edýär), WKF kumite (tutluşyk 8 utuga çenli dowam edýär) we şobu ippon kumiteniň aňrybaş agram derejesindäki tutluşygynda (tutluşyk 2 utuga çenli dowam edýär) gazandy.

Öwezmyrat Sapadurdyýew ýakynda Germaniýanyň Berlin şäherinde geçirilen Banzai Cup-2022 halkara ýaryşynda hem kata görnüşi boýunça 12 ýaşa çenli ýetginjekleriň arasynda altyn medal gazanyp bilipdi.

Öwemyradyň tälimçisi öz kakasy, gara guşagyň 3-nji danynyň eýesi Sapadurdy Setdarowdyr. Ol Türkmenistanyň milli ýygyndysyna hem tälim berýär.

Teswirler
Teswir ýazmak üçin içeri giriň ýa-da registrasiýa boluň