Türkmenistanyň futbol çempionatynyň 4-nji tapgyrynda Balkanabat şäherinde geçirilen «Nebitçi» ― «Merw» duşuşygy möwsümdäki iki täzeligiň gurşawynda geçdi. Bu duşuşykda ýer eýeleri möwsümdäki ilkinji ýeňşini gazanan bolsa, myhmanlar ilkinji gezek utulyp, ýaryş tertibiniň birinji basgançagyndaky ýerini elden gidirdiler.
3:2 hasabynda «Nebitçiniň» ýeňşi bilen tamamlanan duşuşygyň, aslynda, 11-nji minudynda «Merw» Söhbet Allanurowyň 11 metrlik jerime urgusyndan dürs peýdalanmagy bilen hasaby ilki bolup açdy. Ýöne bassyr üç utulyşdan soň öz meýdanynda nobatdaky ututlyşy kabul etmedik «Nebitçi» 47-nji minutda Magtymberdi Berenow bilen hasaby deňledi. Şondan 9 minut soňra Seýitmämmet Hojamämmet «Nebitçiniň» bu duşuşygynda-da tapawutlanyp, ýer eýelerini hasapda öňe çykardy. Bu üstünlik olary has-da ganatlandyrdy we has ýiti hüjümlere iterdi. Bu bolsa «Merwiň» futbolçylarynyň öz jerime meýdançasynda oýnuň düzgünini bozmagyna getirdi. 60-njy minutda 11 metrlik jerime urgusyndan dürs peýdalanan tejribeli goragçy Serdar Annaorazow «Nebitçiniň» duşuşykdaky üçünji pökgüsini öz adyna ýazdyrdy. Duşuşykdaky ahyrky pökgini goşmaça wagtyň 2-nji minudynda «Merwiň» ýarym goragçysy Alibek Abdyrahmanow geçirdi.
Edil şeýle hasap bilen geçen tapgyrda «Köpetdagdan» asyn gelen «Nebitçi» bu gezek ýaryşyň liderini ýeňdi we tertibiň altynjy basgançagyna çykdy. Tapgyra kerwenbaşy bolup girişen «Merw» bolsa ikinji orna düşdi. Häzir «Merwiň» 9, «Nebitçiniň» 3 utugy bar.
«Nebitçi» indiki tapgyrda «Aşgabadyň» myhmany bolar, «Merw» bolsa ýurduň häzirki çempiony «Altyn asyry» kabul eder.
