24-nji fewralda Malaziýanyň Kuala-Lumpur şäherinde Aziýa Kubogy-2023-iň saýlama tapgyrynyň bije çekişlik dabarasy geçiriler, bu barada AFK-nyň resmi saýty habar berýär.
Dabarany göni ýaýlymda AFK-nyň Youtube-daky resmi kanaly görkezer. Bije çekişlik Aşgabat wagty bilen sagat 12:00-da başlanar.
Türkmenistanyň milli ýygyndy topary futbol boýunça 2022-nji ýylda Katarda geçiriljek Dünýä çempionatynyň Aziýa saýlama tapgyryndan geçip bilmedi we mundan beýläk çykyşyny Aziýanyň Kubogynyň saýlama tapgyrynda dowam etdirer.
Bu ýaryş 2023-nji ýylyň 16-njy iýun — 16-njy uýul aralygynda Hytaýda 18-nji gezek geçiriler.
Ýurduň Pekin, Týanszin, Şanhaý, Çunsin, Çendu, Sian, Dalýan, Sindao, Sýamyn we Suçžou ýaly şäherleri Aziýanyň Kubogynyň oýunlaryny kabul eder.
Jemleýji tapgyra diňe 24 topar gatnaşar. Olardan 13-si eýýäm belli: Siriýa, Awstraliýa, Eýran, Saud Arabystany, Ýaponiýa, BAE, Koreýa Respublikasy, Oman, Katar, Yrak, Wýetnam, Liwan we Hytaý (ýer eýesi).
Aziýanyň Kubogynyň final tapgyryna gatnaşmak hukugyna eýe bolmak üçin ýene-de 24 ýygyndy bäsleşer, olaryň arasynda Türkmenistanyň milli ýygyndy topary hem bar.
Bije çekişlik üçin sebetleriň düzümi 10-njy fewralda FIFA-nyň täzelenen reýtingi çap edileninden soň kesgitlendi. Netijede Türkmenistanyň futbol boýunça milli ýygyndysy Aziýanyň Kubogynyň saýlama tapgyrynyň bije çekişliginde ikinji sebede düşdi.
Bije çekişlikde ýygyndylaryň ýerleşen sebetleriniň düzümi:
Kabul edýän tarap: Özbegistan, Gyrgyz Respublikasy, Hindistan, Kuweýt, Malaýziýa, Mongoliýa
1-nji sebet: Bahreýn, Iordaniýa, Palestina;
2-nji sebet: Taýland, Täjigistan, Filippinler, Türkmenistan, Gonkong;
3-nji sebet: Owganystan, Ýemen, Mýanma, Maldiwler, Indoneziýa;
4-nji sebet: Singapur, Nepal, Kamboja, Bangladeş, Şri-Lanka.
Bije çekişligiň netijesinde hersinde 4 ýygyndyny jemleýän toparçalaryň 6-sy emele geler. Saýlama ýaryşynyň toparçalardaky duşuşyklary merkezleşdirilen görnüşde bir tapgyrda 2022-nji ýylyň 8, 11 we 14-nji iýunynda geçiriler.
Toparçalaýyn bäsleşikleriň geçiriljek ýerleri we wagty soň belli ediler.
Toparçalaýyn bäsleşigiň netijesinde her toparçanyň ýeňijisi bilen ikinji orunlary eýelän ýygyndylaryň 5-si Aziýanyň Kubogynyň final böleginde çykyş etmäge mümkinçilik alar.
