Ýaponiýanyň Honda awtoulag konserni bütin dünýäde satylan ulaglarynyň 788 müňüsini hereket wagty açylýan öňgapaklary (kapotlary) üçin yzyna çagyrmak kararyna geldi.
Bu baradaky habar geçen annada ABŞ-nyň Ýol howpsuzlygy boýunça milli edarasy (NHTSA) tarapyndan ýaýradyldy, bu barada Trend ýazýar. Awtoulaglaryň görkezilen sanyndan 725 müňüsi ABŞ-da satylandyr.
NHTSA-nyň habarnamasynda bu tutumyň 2016 — 2019-njy ýyllar aralygynda öndürilen Passport, Pilot hem-de Ridgeline kysymlaryna degişlidigi bellenýär.
Hondanyň maglumatlaryna görä, näsazlyk öňgapagyň gulpundaky sazlaýja zeper ýetmegi bilen bagly bolup biler, netijede, bu ýagdaý öňgapagyň doly ýapylmazlygyna sebäp bolýar.
2022-nji ýylyň 17-nji ýanwardan başlap, kompaniýanyň dilerlik merkezlerinde öňgapagyň näsaz sazlaýjysyny bejerdip ýa-da öňgapagy tutuşlygyna çalyşdyryp bolar. Hyzmat mugt bolar.