2020-nji ýylda Türkmenistanyň Senagatçylar we telekeçiler birleşmesiniň we onuň agzalarynyň, şeýle hem ministrlikleriň, pudaklaýyn dolandyryş edaralarynyň we häkimlikleriň buýurmalary esasynda medeni-durmuş, senagat we oba hojalyk önümçiligine degişli bolan desgalaryň 66 sanysynda gurluşyk-gurnama we abatlaýyş-bejeriş işleri alnyp baryldy. Bu barada «Rysgal» gazeti habar berýär.
Ýaşaýyş jaýlarynyň 26-sy, şol sanda Aşgabat şäherinde 12 gatly, 72 öýli jaýlaryň 10-sy we 12 gatly, 48 öýli jaýlaryň 4-si, Ahal welaýatynda 4 gatly, 48 öýli jaýlaryň 2-si, Daşoguz welaýatynda 4 gatly, 12, 16, 24 we 32 öýli jaýlaryň 7-si, Mary welaýatynda 32 öýli jaýlaryň 2-si we 24 öýli jaý gurlup, ulanylmaga berildi.
Mundan başga-da, orta we hünärment mekdepleriň 4-siniň, şol sanda Aşgabat şäherinde 600 orunlyk orta mekdebiň 2-siniň, Mary welaýatynda orta hünär mekdebiniň we umumybilim berýän mekdebiň, Aşgabat şäherinde 160 orunlyk çagalar bagynyň gurluşygy doly tamamlandy. Mary welaýatynyň Wekilbazar etrabynda çagalar dynç alyş merkezi gurlup, ulanylmaga berildi. 2020-nji ýylda gurluşykçy telekeçileriň bina eden saglygy goraýyş maksatly desgalarynyň 3-si, şol sanda Ahal welaýatynyň Ak bugdaý etrabynyň Bagabat obasyndaky şypahana we Gökdepe etrabynyň Yzgant obasyndaky Ýokanç keseller hassahanasy Türkmenistanyň Prezidentiniň gatnaşmagynda açylyp, ulanyşa girizildi. Şeýle-de Mary welaýatynyň Baýramaly etrabynda Saglyk merkezi gurlup, halkyň hyzmatyna berildi.
Geçen ýylda ýurdumyzyň telekeçileri tarapyndan karantin nokatlarynyň 5-si, şol sanda Balkan welaýatynyň Türkmenbaşy etrabyndakyGarabogaz gözegçilik-geçiriş wagtlaýyn karantin nokady, Lebap welaýatynyň Farap etrabyndaky gözegçilik-geçiriş wagtlaýyn karantin nokatlarynyň 2-si, Lebap welaýatynyň Türkmenabat şäherindäki hem-de Mary welaýatynyň Serhetabat etrabyndaky gözegçilik-geçiriş wagtlaýyn karantin nokatlary guruldy.
Oba hojalyk desgalary
Ýurdumyzda oba hojalyk desgalarynyň gurluşygy-da giň gerimde alnyp barylýar. Telekeçilerimiz tarapyndan 2020-nji ýylda oba hojalyk ugurly önümçilik desgalarynyň 6-sy, şol sanda Gökdepe etrabyndaky guşçulyk toplumy we Ak bugdaý etrabyndaky weterinariýa bejerişhanasy we öý haýwanlary saklanylýan toplum, Balkanabat şäherindäki gök we bakja önümlerini ýetişdirýän ýyladyşhana, Görogly etrabyndaky maldarçylyk toplumy we Türkmenbaşy etrabyndaky tomat goýutmasyny öndürýän kärhana, Mary etrabyndaky gök we bakja önümlerini ýetişdirýän ýyladyşhana gurlup, ulanylmaga berildi.
Senagat ugurly desgalar
Telekeçiler senagat ugurly önümçilik kärhanalarynyň gurluşygyny hem giň gerimde alyp barýarlar. 2020-nji ýylda şeýle maksatly desgalaryň 5-siniň, şol sandaAşgabat şäherinde demirden dürli bezeg önümlerini öndürýän kärhananyň, Ahal welaýatynyň Gökdepe etrabynda demirbeton önümlerini öndürýän kärhananyň 2-siniň, Balkan welaýatynyň Türkmenbaşy etrabynda Gury gurluşyk garyndy materiallarynywe gipsokarton öndürýän kärhananyň, Lebap welaýatynyň Halaç etrabynda keramiki kerpiç öndürýän kärhananyňulanylmaga berilmegi munuň aýdyň subutnamasydyr.
TSTB-niň agzalarynyň yhlasly zähmeti bilen 2020-nji ýylda köprüleriň, awtomobil ýollarynyň we ýerasty geçelgeleriň 2-si, şol sanda Aşgabat şäheriniň S.Türkmenbaşy şaýoly bilen A.Nyýazow şaýolunyň çatrygyndaky ýerasty awtomobil ýoly we pyýada geçelgesi hem-de Magtymguly şaýolunyň ugrunda Taslama we Tähran köçeleriniň aralygyndaky inžener ulgamlary bilen bilelikde umumy uzynlygy 5564 metr bolan awtomobil ýollary gurlup, ulanylmaga berildi. Mundan başga-da, Aşgabat şäherinde Awtoulag kärhanalar toplumy we awtomobil mekdepleriniň birleşiginiň okuw-türgenleşik merkeziniň binalary halkyň hyzmatyna berildi. Geçen ýylda hususyýetçiler Aşgabat şäherinde «Welosiped», «Alabaý», Ahal welaýatynyň Ak bugdaý etrabynda «Saglyk» binalaryny gurdular.
Beýleki binalar
Ýurdumyzda döwrebap söwda, sport we medeni-durmuş maksatly desgalaryň yzygiderli gurulmagyna-da aýratyn ähmiýet berilýär. Geçen ýyl ýurdumyzyň gurluşykçy telekeçileri Aşgabat şäherinde Türkmenistanyň Sport we ýaşlar syýasaty ministrliginiň edara binasyny, Sportuň Olimpiýa görnüşleri fakultetiniň binasyny, Köpugurly sport binasyny, 450 orunlyk umumy ýaşaýyş jaýyny hem-de «Jahan» döredijilik merkezini, Aşgabat şäherinde söwda-dynç alyş merkezleriniň 2-sini, söwda we edara binasyny ulanmaga berdiler. Mundan başga-da, metjitleriň 2-si, şol sanda Balkan welaýatynyň Balkanabat şäherinde we Lebap welaýatynyň Türkmenabat şäherinde 3000 orunlyk metjitler açyldy.
Türkmenistanyň Prezidenti hususy ulgamyň kärhanalaryna iň iri we örän jogapkärli ykdysady ähmiýetli taslamalary amala aşyrmagy ynanýar. «Aşgabat—Türkmenabat» ýokary tizlikli awtomobil ýoly, Ahalwelaýatynyň döwrebap täze dolandyryş merkezi häzirki wagtda diňe bir sebitde däl, eýsem, dünýäde amala aşyrylýan iri taslamalardyr. Geljekde örän ýokary ykdysady bähbidi boljak «Aşgabat — Türkmenabat» ýokary tizlikli awtomobil ýoly häzirki döwürde Ahal, Mary we Lebap welaýatlarynyň çäklerinde gurulýar. Halkara ýoluň gurluşygy sebitde iri täze infrastrukturalaryň we müňlerçe iş orunlarynyň döredilmegine mümkinçilik berýär. Bu awtoban döwrüň ýokary talaplaryna laýyk geler, halkara ulag-üstaşyr geçirijiligi ýokarlandyrar, haryt dolanyşygynyň amala aşyrylmagyna giň şertleri döreder. Geljekde onuň Aşgabat — Türkmenbaşy awtobany, Türkmenbaşy Halkara deňiz porty bilen birleşdirilmegi netijesinde, Türkmenistanda harytlaryň we ýükleriň daşalmagyny has-da ýeňilleşdirýän täze halkara ýol düzümi peýda bolar.
Ahal welaýatynda...
Türkmenistanyň Prezidentiniň «Ahal welaýatynyň täze, döwrebap edara ediş merkezini gurmak hakynda» 2019-njy ýylyň 4-nji martynda çykaran Karary esasynda, Ahal welaýatynyň Gökdepe etrabynyň çäginde welaýatyň täze, döwrebap edara ediş merkeziniň gurluşygyny tapgyrlaýyn amala aşyrmak bellenildi. Ahal welaýatynyň täze, döwrebap edara ediş merkezinde jemi binalaryň we desgalaryň 329-syny gurup, ulanmaga bermek meýilleşdirildi. Şolaryň 258-si 5, 7, 9 we 2 gatly ýaşaýyş jaýlary hem-de 69-sy dürli maksatly desgalardyr. Häzirki wagtda Aşgabat şäheriniň Tähran köçesiniň ugrunda umumy tutýan meýdany 8 gektar bolan, paýly gurluşyk esasynda maliýeleşdirilýän Söwda we dynç alyş, işewürlik merkezinden hem-de döwrebap ýaşaýyş jaýyndan ybarat bolan binalar toplumynyň gurluşygy ýokary depginde alnyp barylýar. Aşgabat şäheriniň Büzmeýin etrabynyň Gurtly ýaşaýyş toplumynda umumy meýdany 91,06 gektara barabar bolan ýer böleginde 62 sany 4 gatly ýaşaýyş jaýlarynyň, söwda we medeni-dynç alyş merkeziniň we bazaryň gurluşyk işleri ýokary depginde dowam edýär.