Müsüriň paýtagty Kairde ýerli hünärmen Mahmud el-Komy tarapyndan döredilen «Cira 3» diýlip atlandyrylan robot «COVID-19» ýokanç keseline garşy aýgytly göreş üçin oýlanyp tapylan, diýseň oňyn çözgütdir. Bu robot koronawirusa ýolugan diýlip güman edilen adamlaryň, bu kesele ýolugyp-ýolukmandygyny anyk barlap bilýär, näsaglaryň gyzgynyny takyk ölçäp bilýär, hat-da adamlar agyz-burun örtügini geýmese duýduryş berip bilýär.
«Cira 3» robotynyň oýlap tapyjysy Mahmud el-Komy: «Men roboty dizaýn edenimde, robotyň adama meňzemegini isledim. Çünki, men «COVID-19» ýokanç keseline ýolugan adamlaryň guty ýaly enjam bilen ýüzbe-ýüz bolmagyny islemeýärdim» – diýip belleýär.
«Cira 3» robotynyň edip bilýän işi gyzzyrmany ölçemeklik we agyz-burun örtügini geýmekligi duýduryş bermeklik bilen çäklenmeýär. Bu robot gan barlagyny hem geçirip bilýär, hat-da ekokardiogramma bilen rentgene-de alyp bilýär. Alan rentgenleriniň netijesini bolsa döşündäki ekranda görkezýär.
«Cira 3» robotynyň işjeň hyzmatyndan ilkinji bolup peýdalanan hususy hassahananyň eýesi Abu Bakr El-Mihi: «Näsaglaryň oňyn reaksiýalary bar. Roboty görýärler we gorkmaýarlar. Munuň tersine, robotyň adamlara garanyňda has takyk barlaglary geçirip biljekdigine örän içgin ynanýarlar.» – diýip belledi. Şeýle hem ol, bu roboty «COVID-19» bar diýlip güman edilen adamlaryň gyzgyny ölçemeklik üçin ulanandyklaryny we onuň kömegi bilen saglygy goraýyş işgärleriniň töwekgelçiligini azaldandyklaryny aýtdy.