Kaka etrabynyň Medeniýet öýünde Dünýä türkmenleriniň ynsanperwer birleşiginiň agzalarynyň hem-de Ahal welaýatynyň häkimliginiň wekilleriniň gatnaşmagynda "Keramatdyr bu toprak – ata-babalarymyzyň aýdany" atly maslahat geçirildi.
"Ahal durmuşy" gazetinde berilýän habara görä, bu maslahat ýurduň hemişelik bitaraplygynyň 25 ýyllygyna bagyşlandy.
Çykyş edenler Türkmenistanyň halkara guramalary we beýleki döwletler bilen netijeli gatnaşygyny we mukaddes türkmen topragynda bolup geçýän taryhy wakalaryň dünýäniň dürli künjeklerinde ýaşaýan türkmenleriň arasynda buýsanç duýgusyny döredýändigini bellediler.
Etrabyň medeni bölümi tarapyndan taýýarlanan dürli aýdym-sazly konsert programmasy maslahata aýratyn bezeg berdi. Mundan başga-da, maslahata gatnaşyjylar Abiwerd döwlet taryhy goraghanasynyň çäginde ýerleşýän taryhy we arheologiki ýadygärliklere baryp gördüler. Mäne Babanyň kümmeti myhmanlarda aýratyn täsir galdyrdy. Ilkinji türkmen seljuk soltanlary Çagry beg hem-de Togrul beg tarapyndan, Gündogaryň beýik akyldary keramatly pir Abu Sagyt Abul Haýyryň — Mäne babanyň guburynyň üstünde gurdurylan bu arhitektura ýadygärliginiň taryhy dogrusyndaky gürrüňler myhmanlaryň gyzyklanmasyny has-da artdyrdy.