Aziýanyň Futbol konfederasiýasynyň ýaryşlary guramak baradaky komiteti 2022-nji ýylda geçiriljek Dünýä çempionatynyň ikinji saýlama tapgyrynyň duşuşyklarynyň geçiriljek wagtyny belli etdi. Bu barada AFK-nyň resmi saýty habar berýär.
AFK-nyň degişli komitetiniň onlaýn görnüşde geçirilen ýygnagynda Katarda geçiriljek dünýä çempionatynyň yklym boýunça ikinji saýlama tapgyrynyň duşuşyklarynyň 2021-nji ýylyň 15-nji iýunda tamamlanjakdygy habar berildi. Şunda ýedinji we sekizinji tapgyryň duşuşyklaryny mart, dokuzynjy we onunjy tapgyrlaryň duşuşyklaryny bolsa iýun aýynda geçirmek meýilleşdirilýär. Yklymlaýyn saýlama duşuşyklaryň jemleýji bölegine 2021-nji ýylyň sentýabr aýynda badalga berler.
Türkmenistanyň futbol boýunça milli ýygyndysynyň öňdäki dünýä çempionatynyň we Aziýa kubogynyň saýlama ýaryşlaryna «H» toparçada gatnaşýar. Häzir milli ýygyndymyz 9 utuk bilen toparçada birinji orny eýeleýär. Biziň toparçamyzda Koreýa Respublikasynyň, Liwanyň, KHDR-nyň we Şri-Lankanyň ýygyndylarynyň hem bardygyny ýatladýarys.