Howanyň düzümindäki tozan bulutlary sebäpli şu gün gije Aýyň bütin ýer ýüzüne mawy reňkde görünmegi astronomiki hadysalar bilen baglanyşyklydyr.
Adatça, Aý fazalarynyň netijesinde «dolan Aý» bir aýyň dowamynda bir gezek ýüze çykýar. Ýöne, astronomiki hadysalar Aý fazalarynyň uzak wagtyň dowamynda «dolan Aýyň» bir aýda iki gezek görünmegine-de sebäp bolup bilýändigini ylmy taýdan aýan edýär. Hut şu nukdaýnazardan-da, şu ýylyň 2-nji oktýabry bilen 31-nji oktýabrynda, ýagny bir aýda iki gezek «dolan Aýy» görýäris. Bir aýda ikinji gezek ýüze çykýan «dolan Aýa» bolsa «Mawy Aý» diýilýär. Şu gün gije görünjek «mawy Aý», 76 ýyldan soň ilkinji gezek dünýäniň çar künjeginden tomaşa ediler.
Aslynda, Aýyň reňki mawy bolmaýar, ýöne ýer ýüzüne ol mawy reňkde görünýär. Ýagny, wulkanlaryň atylmagy ýa-da ýerdäki tokaý ýangynlary sebäpli dörän tozan bulutlarynyň hereketi wagtynda «dolan Aý» belli bir möhlet mawy reňkde görünýär. Astronomlar hakykatdanam Aýyň reňkiniň üýtgemeýändigini, tozan bulutlary sebäpli mawy reňke meňzeýändigini habar berýärler.
«Mawy Aýyň» gök ýüzünde şu gün peýda boljakdygynyň anyk taryhy senesini bolsa Amerikanyň milli awiasiýa we kosmos dolandyryş gullugy bolan NASA şereketi mundan birnäçe hepde öň yglan etdi.
Şu gün ikinji «dolan Aý» – «Mawy Aý» sagat 18: 28-de dogup başlar.
