UEFA Super Kubogynyň eýesi “Bawariýa” we gyzykly maglumatlar

11:0525.09.2020
0
2129
UEFA Super Kubogynyň eýesi “Bawariýa” we gyzykly maglumatlar

Wengriýanyň paýtagty Budapeştdäki Puşkaş Arenada oýnalan UEFA Super Kubogy duşuşygynda “Bawariýa” ýeňiş gazandy. Çempionlar ligasynyň çempiony hökmünde bu duşuşykda çykyş eden nemes kluby Ýewropa ligasynyň ýeňijisi “Sewilýadan” goşmaça wagtda 2-1 hasabynda üstün çykdy. Ilkinji hüjümleri eden “Sewilýa” ilkinji bolubam hasaby açdy. Oýnuň 13-nji minutynda angliýa emin Entoni Teýloryň bellän penalti urgusyny dürs uran Lukas Okampos ispan klubuny öňe saýlady. Ýöne nemes klubunyň bu gola jogaby gijikmedi. Oýnuň 34-nji minutynda Lewandowskiniň owadan pasynda topy batly uran Leon Goreska hasaby deňledi. Oýnuň 1-nji ýarymy bu hasap bilen tamamlandy. 2-nji ýarymyň ilkinji minutlarynda nemes kluby 2 gol geçirdi. Lewandowskiniň goly ofsaýt sebäpli, Saneniň goly-da şol pursatda Lewandowskiniň oýnuň düzgünini bozandygy nazarda tutulyp, iňlis emini tarapyndan hasaba alynmady. 65-nji minutdan soň, bolsa oýunda jylawy ele alan “Sewilýa” yzly-yzyna hüjüm baryny etdi. Oýnuň ahyrlarynda-da “Bawariýanyň” hüjümleri netije bermedi we duşuşygyň esasy wagty 1-1 deňlikde gutardy. Goşmaça wagtda-da ilki ispanlar, soňra-da nemesler örän amatly pursatlar döretdiler. Oýnuň 104-nji minutynda burçdan ýerine ýetirilen urgudan soň daşlaşdyrylan topy Alaba batly urdy. Derwezeçiden yzyna gaýdan topy-da 99-njy minutda oýna giren Hawi Martines derwezä gönükdirdi. Bu duşuşykdaky soňky gol bolup, “Bawariýa” 2013-nji ýyldan soň, taryhynda 2-nji gezek UEFA Super Kubogyny eýelemegi başardy. Şunlukda “Bawariýa”, 2020-nji ýyldaky 4-nji kubogyny asmana göterdi. Duşuşygyň iň ökde oýunçysy diýlip, germaniýaly Tomas Müller saýlandy.

Gyzykly maglumatlar

* 6-njy gezek UEFA Super Kubogy duşuşygynyň ýeňijisi goşmaça wagtda kesgitlendi.

* 45-nji gezek oýnalan UEFA Super Kubogy duşuşygynda 25-nji sapar Çempionlar ligasynyň ýeňijisi ýeňiş gazandy.

* “Bawariýa” bu kubogy azyndan 2 gezek eýelän 10-njy klub boldy.

* “Bawariýa” şu ýyl oýnan soňky 23 duşuşygynda-da ýeňiş gazandy

* Bu duşuşykda goşmaça wagtda tapawutlanan Hawi Martines 2013-nji ýylda-da goşmaça wagtda gol geçirip, “Bawariýanyň” ilkinji Super Kubogyny gazanmagynda uly rol oýnapdy.

* “Sewilýa” 5-nji gezek UEFA Super Kubogy duşuşygynda ýeňlişe sezewar boldy

Teswirler
Teswir ýazmak üçin içeri giriň ýa-da registrasiýa boluň