Mary etrabynyň çäginde ýerleşýän «Täze aý önümleri» hojalyk jemgyýetiniň «Datly şerbet» hususy kärhanasynyň ýanynda gurlan önümçilik binasynda gaty, galyň kagyzdan dürli görnüşli we dürli ölçegdäki gutulary öndürmek ýola goýuldy ― diýip, «Türkmenistan» gazeti habar berýär.
Bu önümçiligiň işe girizilmeginiň netijesinde, kärhana döwrebap, göze gelüwli kagyz gutular bilen doly üpjün edilýär. Täze kärhananyň bölümleri dünýäniň ösen döwletleriniň kuwwatly kagyz işläp bejerýän tehnologiýalar toplumyna eýedir. 3 we 5 gatdan ybarat dürli ölçegdäki gaty kagyzlaryň aýda 2 müň tonnasy öndürilýär. Ýokary hilli bu kagyzdan 3 reňkde ýazgy ýazylan gutular taýýarlanylýar.
Hususy kärhanada taýýarlanylýan gutular azyk, senagat we oba hojalyk önümlerini ýerleşdirmekde amatlydyr. Kagyz gutularyň köpçülikleýin öndürilip başlanmagy kärhananyň bu önümi başga ýerden satyn almak zerurlygyny aradan aýyrýar. Döwrebap we ýokary hilli kagyz gutulary bu kärhana müşderileriň, şol sanda beýleki kärhanalaryň buýurmalary esasynda hem taýýarlap berýär.