Täjibaý meýdançasynda burawlanan 1-nji ulanyş guýusyndan tebigy gazyň senagat akymy alyndy diýip, “Türkmen gündogary” gazeti ýazýar.
Bu möhüm işi «Türkmengeologiýa» döwlet korporasiýasynyň «Türkmennebitgazgözleg» trestiniň «Lebapnebitgazgözleg» ekspedisiýasynyň buraw ussasy Işan Mämmetgulyýew tarapyndan baştutanlyk edilýän toparynyň agzalary ýerine ýetirdiler.
Iri Malaý gaz käniniň golaýynda ýerleşýän Täjibaý meýdançasy soňky döwürde senagat taýdan işjeň özleşdirilip başlandy. Häzirki günlerde «Lebapgazçykaryş» müdirliginiň hünärmenleri täze guýyny gaz akdyryjy ulgama birikdirmek boýunça degişli işleri ýaýbaňlandyrýarlar. Şunlukda, bu kände önüm berýän guýularyň sany üçe ýeter. Ekspedisiýanyň baýlyk agtaryjylary şanly ýyly üstünlikli jemlemek, ýurdumyzyň uglewodorod serişdeleriniň gorunyň üstüni ýetirmek ugrunda gözleg-agtaryş guýularyny burawlamak işlerine giň gerim berýärler.