Täjigistanyň futbol çempionatynyň 6-njy tapgyrynda «Istiklol» ýaryşyň soňky ornundaky «Istrawşan» bilen duşuşdy.
Duşuşykda Duşenbe şäheriniň topary garşydaşyň derwezesine jogapsyz pökgüleriň sekizisini geçirdi. Şeýlelikde, olar Täjigistanyň çempionatynyň şu möwsümindäki iň uly hasaply ýeňşi gazandylar.
«Istiklolyň» türkmenistanly hüjümçisi Wahyt Orazsähedow ikinji ýarymda Şeriddin Boboýewiň ornuna oýna girdi. Biziň ildeşimiz duşuşygyň 78-nji minudynda tapawutlandy.
«Istiklol» indiki duşuşygyny 28-nji iýunda myhmançylykda geçirer. Şol topar Hujand şäherindäki Täjigistanyň Garaşsyzlygynyň 20 ýyllygy adyndaky stadionynda adybir topar bilen duşuşar.
