Türkmenistanyň futbol çempionatynyň 14-nji tapgyrynda Türkmenbaşy şäheriniň «Şagadamy» Marynyň «Energetigini» 7:0 hasabynda ýeňdi. Şeýlelikde, tapgyrda eýýäm ikinji duşuşyk şol bir hasapdaky tapawutly netije bilen tamamlandy. Mundan ozal «Altyn asyr» hem «Nebitçini» edil şu hasap bilen ýeňipdi.
Duşuşykdaky gol perdesini 14-nji minutda dürs ýerine ýetiren 11 metrlik jerime urgusyndan Baýramgeldi Nurlyýew açdy. Şondan 12 minut soňra «Energetigiň» derwezesine ýene bir 11 metrlik urgy bellenildi. Bu gezek «Şagadamyň» şu möwsümdäki iň netijeli futbolçysy Yhlas Magtymow tapawutlandy. 37-nji minutda Daýanç Orazgulyýew tapawutlanyp, 44-nji minutda Baýramgeldi Nurlyýew duşuşykdaky ikinji pökgüsini geçirip, birinji ýarym ýer eýeleriniň 4:0 hasabyndaky üstünligi bilen tamamlandy.
«Şagadam» badyny ikinji ýarymda hem gowşatmady. 51-nji minutda Hydyr Ýakubow hasaby 5:0-a çykardy. 55-nji minutda toparynyň altynjy pökgüsini geçiren kapitan Hemra Amanmämmedow «Şagadamyň» soňky üç duşuşygynda hem tapawutlanyp, topardaşlaryna ajaýyp görelde görkezdi. Duşuşygyň jemleýji pökgüsini 89-njjy minutda ýene-de Yhlas Magtymow geçirdi.
Şeýlelikde, utugyny 22-ä çykaran «Şagadam» ýaryşyň üçünji ornundaky ýerini gorady, 8 utukly «Energetik» bolsa ýene-de iň soňky orunda galdy. 14 tapgyrda 13 duşuşyk geçiren «Şagadam» 10-njy tapgyryň galdyrylan duşuşygynda «Altyn asyryň» myhmany bolar.
«Şagadam» – «Energetik» – 7:0
Gollar: Baýramgeldi Nurlyýew, 14 (11 m.j.u.) 44, Yhlas Magtymow, 26 (11 m.j.u.), 89, Daýanç Orazgulyýew, 37, Hydyr Ýakubow, 51, Hemra Amanmämmedow, 55.
